ASNN – Temperaturat e larta nuk do të jenë problem për atletët që do të marrin pjesë në botërorin e atletikës që zhvillohet në Doha. Organizatorët kanë menduar që sportistët të bëjnë përshtatjen e duhur nga temperaturat e larta jashtë stadiumit, në më të freskëta brenda tij. Kjo do të bëhet nëpërmjet një tuneli që lidh mjediset jashtë stadiumit me pistën brenda tij. Kryeqyteti i Kataris, Doha, është duke u përgatitur të mirëpresë atletët nga e gjithë bota për Kampionatin Botëror të Atletikës.

Por temperaturat e larta atje janë një problem, për atletët që do të garojnë, por jo për organizatorët, të cilët thonë se kanë marrë masat e duhura. Një specialist i shkencave sportive thotë se edhe pse kushtet e motit do të jenë veçanërisht të nxehta, janë marrë masa për të ndihmuar atletët të përshtaten dhe të garojnë më mirë. Për më shumë sqaron, Sébastien Rasineja, shkencëtar kërkimor dhe Shef i Shëndetit dhe Paraqitjes së Atletëve.

“Atletët që do të garojnë në Stadiumin Ndërkombëtar “Khalifa” Stadium do të bëjnë atë që ne e quajmë “një udhëtim termik”, – ka shpjeguar ai. – Pra ata do të kalojnë nga temperaturat natyrore të mjedisit, jashtë stadiumit, në më të freskëta brenda. Kjo do bëhet nëpërmjet kalimit të një tuneli, që lidh mjedisin e jashtëm me pistën. Këtu fillon ulja progresive e temperaturës, hap pas hapi, në mënyrë që përshtatja e atletëve të jetë e natyrshme, nga mjedisi i ngrohtë në atë konkurrues më të freskët.”

Rasineja ka sqaruar se gara të ndryshme kërkojnë temperatura të ndryshme. “Ajo që dimë është se ekziston në mënyrë efektive një lidhje midis temperaturës dhe paraqitje gjatë një maratone. Maratona më e shpejtë është ajo e Berlinit, që zhvillohet me temperaturë të ftohtë, por në një mjedis të nxehtë dhe të lagësht siç do të kemi këtu në Doha dhe si ajo në Tokio vitin e ardhshëm për Lojërat Olimpike, mund të presim që një maratonë të jetë pak më e ngadaltë por jo në mënyrë dramatike më e ngadaltë.”