ASNN – Apolonia ka gjetur sot fitoren 4-të në këto 12 javë të këtij sezoni të Kategorisë së Parë të Kampionatit Kombëtar të Futbollit, pasi ka mposhtur me një gol të vetëm Pogradecin në fushën e këtij të fundit. Kjo ndeshje, që është sjellë drejtpërdrejt nga Rrjeti i Radio-Televizionit Shqiptar, është vendosur në favor të fierakëve nga një gol i Kaçikut në pjesën e parë. Niveli i dytë të Kampionatit Kombëtar të Futbollit, që njihet si Kategoria e Parë, ka ulur të hënën siparin e javës së tij të 12-të, me takimin midis Pogradecit dhe Apolonisë, që u fitua nga vendasit me një gol të vetëm.
Pasi ka sjellë të shtunën ndeshjen e vlefshme midis Besëlidhjes dhe Erzenit, që ishte e vlefshme për grupin A dhe që u fitua nga lezhjanët me shifrat 2-0, me nga një 11-metërsh të realizuar me sukses nga kapiteni Dritan Smajlaj për secilën pjesë loje, dhe të dielën ndeshjen e vlefshme gjithashtu për javën e 12-të, por për grupin B, atë midis Dinamos dhe Lushnjës, që u fituar nga miqtë me një gol të vetëm të Branicës, Rrjeti i Radio-Televizionit Shqiptar ka sjellë të hënën edhe emocionet e ndeshjes së zhvilluar pasdreke në Pogradec.
Pjesa e parë e kësaj ndeshjeje është mbyllur me epërsinë minimale të miqve, të cilët kanë gjetur golin në minutën e 39-të, me anë të futbollistit nga Kosova, Albert Kaçikut, i cili është ndihmuar edhe nga dalja e gabuar e portierit Lamellari. Ky i fundit do të vazhdojë të ketë një ditë të keqe, pasi ka dalë me karton të kuq, duke shkaktuar edhe një 11-metërsh. Por portieri i dytë, Mali e ka pritur 11-metërshin, ndërsa në pjesën e dytë, vendasit janë më ngulmues në kërkim të golit të barazimit, duke bërë një vëllim më të madh loje.
Por edhe duke krijuar edhe raste për shënim, madje të pastra, por pa arritur dot të konkretizojnë. Nga ana tjetër, Apolonia ka një shans të mirë për ta dyfishuar epërsinë me anë të Dimos, por ai godet shtyllën. Mbyllet kështu me fitoren 1-0 të Apolonisë kjo sfidë dhe fierakët ngjiten në kuotën e 16 pikëve, por mbeten në vendin e 5-të, ndërsa Pogradeci mbetet në vendin e 8-të, me 11 pikë.
