ASNN – Tirana, Kukësi dhe Vllaznia kanë hedhur nga një hap drejt vendit në çerekfinalet e Kupës së Shqipërisë, pasi kanë fituar me rezultate  bindëse në fushë të huaj, në takimet e para të turit të 16-shes. Sa u përket çifteve të tjera, nuk kanë munguar rezultatet suprizë.

Kështu, veprimtaria e dytë e futbollit shqiptar, Kupa e Shqipërisë, ka luajtur  të mërkurën të gjitha ndeshjet e para të turit të saj të dytë, apo thënë ndryshe, turit të 16-shes. Dhe Rrjeti i Radio-Televizionit Shqiptar ka sjellë për sportdashësit, një nga duelet më të spikatura të grupit B, atë midis Kamzës dhe Vllaznisë.

Në fakt, kjo sfidë ka parë një rezistencë të fortë të vendasve, të cilët militojnë në nivelin e dytë të Kampionatit Kombëtar të Futbollit, që njihet si Kategoria e Parë, e kanë nisur mjaft mirë sezonin e ri, duke kryesuar bindshëm renditjen e grupit A dhe duke qenë pretendentë seriozë për ngjitjen në Kategorinë Superiore.

Por shpresat e Kamzës, që, pasi ka eliminuar në turin e mëparshëm një skuadër të Kategorisë Superiore, siç është Korabi, të bënte të njëjtën gjë edhe me Vllazninë janë shuar në minutat e fundit, pasi shkodranët kanë shënuar dy herë, me anë të Ylli Hoxhës.

Sa u përket çifteve të tjera të këtij turi, rezultatet ishin Apolonia-Skënderbeu 2-1, Dinamo-Kukësi 0-2, Luftëtari-Tirana 1-4 dhe Bylis-Laçi 1-1, në grupin A. Ndërsa në grupin B, ku të gjitha duelet janë përballje midis skuadrave të Kategorisë Superiore dhe asaj Të Parë, u arritën këto rezultatet Besëlidhja-Partizani 1-0, Kastrioti-Teuta 2-1, Kamza-Vllaznia 0-2, Tërbuni-Flamurtari 3-3.

Kupa e Shqipërisë

Turi i 16-shes:

Ndeshjet e para:

Grupi A

Apolonia – Skënderbeu                  2-1

Stadiumi “Loni Papuçiu”, Fier

Dinamo – Kukësi                              0-2

Kompleksi “Internacional”, Pezë-Helmës

Luftëtari – Tirana                              1-4

Stadiumi “Roza Haxhiu”, Lushnjë

Bylis – Laçi                                         1-1

Stadiumi “Adush Muça”, Ballsh

Grupi B

Besëlidhja – Partizani                     1-0

Stadiumi “Besëlidhja”, Lezhë

Kastrioti – Teuta                               2-1

Stadiumi “Kastrioti”, Krujë

Kamza – Vllaznia                             0-2

Fusha Sportive “Fuat Toptani”, Kamëz

Tërbuni – Flamurtari                        3-3     

Stadiumi “Ismail Xhemali”, Pukë

*Ndeshjet e kthimit luhen pas dy javësh, të mërkurën e 9 nëntorit 2016.