ASNN – Sipas mediave lokale sportive në Internet, Besnik Duli, do të jetë trajneri i ri i Veleçikut. Ky është vendimi që është marrë të martën, ndërsa në tavolinën e kryebashkiakut të Koplikut, në të njëjtën kohë presidenti i skuadrës së futbollit të Veleçikut, Ramadan Likaj, kanë qenë dy kandidatura. Përveç Besnik Dulit, për të cilin presidenti Likaj është bindur se duhet të ishte kryetrajner, ka qenë edhe emri i Luan Shpuzës.
Ky i fundit kishte pasur dy ditë më parë një takim me kreun e këtij klubi duke i shprehur gatishmërinë e tij për marrjen e drejtimit të këtij ekipi dhe Likaj e ka dëgjuar me vëmendje. Por natyrisht duke pasur si ide të parë atë të Besnik Dulit. Trajneri i njohur koplikas njihet si personi që ka arritur sukseset më të mëdha në historinë e këtij klubi dhe përpos kësaj njeh edhe më mirë ambientin përreth skuadrës. Pasi ka studiuar të dy kandidaturat, kryebashkiaku Likaj pasditen e së martës ka dhënë verdiktin e tij.
Atë që Besnik Duli do të jetë në krye të Veleçikut për pjesën e mbetur të sezonit. Me të marrë këtë konfirmim, trajneri në fjalë nuk ka hezituar për asnjë moment, por në seancën e së martës pasdite ka qenë para ekipit për të zhvilluar stërvitjen e parë me të. Koplikasit i kanë bërë një nisje të mirë kampionatit, teksa kanë grumbulluar 9 pikë pas 4 ndeshjeve të para dhe janë ende në lojë me pretendimet e tyre për t’u ngjitur në Superiore.