Koplikasit e kanë nisur mirë ndeshjen, ndërsa janë më të pastër në rastet e tyre për shënim, paçka se krutanët kanë pasur epërsinë territoriale. Shaba në minutën e 4-t është privuar nga shtylla. Ndërsa Pepaj në të 13-tën dhe Djepaxhia në të 18-tën minutë janë frenuar nga portieri Selmani. Dhe në minutën e 19-të, atëherë kur pritej që të vinte goli i parë i Veleçikut, Stivën me shumë zgjuarsi ka fituar një 11-metërsh për Kastriotin pas pengimit nga pas të Culiq.
Nga pika e bardhë ka shënuar Bakiu, i cili në minutën e 39-të do të shërbente shumë saktë pas shpinës së mbrojtjes koplikase për Stivënin dhe nigeriani përballë Lopcit nuk ka falur e ka shënuar golin e dytë. Në fundin e pjesës së parë gjërat janë rënduar, sepse Banushi, duke pasur dhe ndihmën e Hoxhës në devijimin e topit në rrjetë, e ka ngushtuar rezultatin në 1-2. Koplikasit kanë marrë zemër dhe kanë hyrë në pjesën e dytë me idenë e barazimit të rezultatit, por pse jo dhe të fitores.
Por të gjitha planet janë prishur nga Bakiu, i cili në minutën e 47-të, pas topit “të artë” të Stivën, do të shënonte goli i tretë. Është një kombinim perfekt mes këtyre dy lojtarëve, të cilët do të shënonin përsëri për Kastriotin në minutën e 66-të, këtë herë nigeriani. E më pas dhe në 72-të, ndërsa Bakiu ka firmosur trigolëshin e tij. Mirëpo mbrojtja krutane ka vijuar të “fusë ujë”, sepse ca edhe nga vetëkënaqësia, Pepaj e Kurtaj kanë ngushtuar për Veleçikun në 3-5.
Dhe me shumë fat Kastrioti ia ka dalë të jetë fitues i kësaj sfide direkte mbijetese duke shpresuar që tashmë shumë shpejt të shkëputet dhe nga vendi i 9-të, që do të thotë ndeshje shtesë me të dytën e grupit të Jugut të Kategorisë së Dytë për të mbijetuar. Gjithsesi Kastrioti ka shumë për të rregulluar, ndonëse dje e ka merituar fitoren.
Veleçiku – Kastrioti 3-5
Shënues: Banushaj 45’+1, Pepaj 69’, Kurtaj 84’ /
Bakiu 20’(11-m.), 47’, 72’, Stivën 39’, 66’
Veleçiku: Lopci, Pllumaj, Lami, Kolaj, Banushaj, Miculi, Djepaxhia, Shaba, Culiq (Zmijani 44’, Kurtaj 55’), Pepaj, Çalekaj (Plishti 61’). Trajner: E. Ligataj
Kastrioti: Selmani, R. Hoxha, Pashai, Dodaj, Peqini (Rustami 76’), Bakiu (G. Hoxha 81’), Kule, Bytyçi (Zela 70’), Pengili, Stivën. Trajner: Sh. Rustami
Gjyqtarë: J. Xhaja, B. Mesi, R. Shaba (Tiranë)
Kartonë të verdhë: Shaba, Culiq / Dodaj, Tali, Stivën
