ASNN – Sekretari i Përgjithshëm i UEFA-s, Xhani Infantino, i cili doli sot para mediave botërore në Nion të Zvicrës, ku u zhvillua një ditë më parë mbledhja e Komiteti Ekzekutiv të UEFA-s, ka folur edhe për Kosovën dhe Shqipërinë, sidomos rreth ndeshjes me Serbinë dhe vendimin e UEFA-s, që u pasua me një sërë reagimesh e protestash nga shqiptarët e revoltuar të cilët vendimin e kanë konsideruar si vendim politik dhe të njëanshëm.
Pyetjes a ishte i njëanshëm dhe politik vendimi i fundit i UEFA-s që favorizoi Serbinë, Xhani Infantino, iu përgjigj se vendimi në fjalë nuk ishte i UEFA-s, por i një komisioni të pavarur displinor. “Komisoni në fjalë ka përfaqësues të vendeve të ndryshme evropiane. Komisioni pasi ka dëgjuar për më shumë se 7 orë argumentimet e palëve në Komisionin e Apelit, UEFA është tërhequr për të marrë vendimin mbi kërkesat e paraqitura nga Federata Shqiptare e Futbollit dhe ajo serbe”, – ka deklaruar ai.
“Apeli la në fuqi vendimin për humbje 3-0 të Shqipërisë me Serbinë. Por nuk mund të thuhet se gjithçka ka mbarur në këtë drejtim, sepse Shqipëria ka ende një shans të mirë me ballafaqimin e Gjykatës së Arbitrazhit në Lozanë”, – shtoi Infantino. Pyetjes se sa Komisioni i Disiplinës e ka marrë parasysh dhunën në stadium, dhe pse UEFA nuk dënoi dhunën e policisë dhe huliganëve serbë ndaj futbollistëve shqiptarë në stadiumin e Beogradit me 14 tetor, ku u panë edhe sulme fizike dhe parrulla antishqiptare me plot elemente raciste, Sekretari i Përgjithshëm i UEFA-s iu përgjigj se “ajo çfarë u pa në Beograd, në stadiumin e Partizanit me 14 tetor nuk kishte të bënte me futbollin e as me sportin, dhe ato skena janë të papranueshme për UEFA-n.”
“Prandaj UEFA ka dënuar këto akte të dhunës nga ana e huliganëve dhe policisë serbe mbi futbollistët shqiptarë në Beograd”, – shtoi Infantino. Sa i përket reagimeve dhe akuzave të tifozëve shqiptarë gjatë protestave, Infantino tha se nuk është e natyrës sonë t’i komentojmë.
