Ai vetëm përsëriti festimin që më parë kishte bërë lojtari me origjinë shqiptare i Olimpiakosit. Por krejt ndryshe nga me Pajtim Kasamin, Andi Lila rrezikon shumë për shkak të këtij festimi pas golit që shënoi në kampionatin grek. Mbrojtësi i kombëtares shqiptare bëri shqiponjën dykrenare me dy pëllëmbët e duarve, pasi realizoi për Janinën ndaj Olimpiakosit, njëlloj si Kasami kur shënoi për Olimpiakosin ndaj Juventusit.
Futbollisti që luan për përfaqësuesen e Zvicrës nuk pati asnjë pasojë, përveç një vërejtjeje nga vetë zviceranët, jo nga grekët, kurse për veprimin e Lilës në Greqi duket sikur ka ndodhur një skandal. Nuki mjaftuan reagimet e ashpra nga tifozët e Olimpiakosit në stadium, dhe fakti që shqiptari as nuk u përgëzua nga shokët e tij të skuadrës për të cilën shënoi.
Mediat greke shkruajnë se shqiponja me dy koka është simbol i Shqipërisë së Madhe, edhe pse dihet nga gjithë bota se ajo ndodhet në flamurin e shtetit të sotëm shqiptar. Në vend që të thuhet se Lila festoi me simbolin e flamurit të tij, deklarohet se bëhet fjalë për Shqipërinë e Madhe. Rreziku për Lilën nuk vjen vetëm nga ndonjë masë e Federatës Greke, por edhe nga vetë klubi i tij, Janina.
Trajneri Janis Petraqis thotë se për mbrojtësin do të diskutohet në klub dhe do të vendoset. Mediat spekullojnë se edhe mund ta përzenë nga Janina, por Petraqis rezervohet duke thënë se kjo është çështje e klubit, jo e tij. Reagimi ndaj Lilës ngjan me atë ndaj Ergys Kaçes kur pozoi me fanelën e UÇK-së dhe u dënua shumë muaj nga vetë klubi tij, PAOK i Selanikut.
