ASNN – Triumfon Sidni MekLaflin, zbret bashkëatdhetaren Muhamed nga froni olimpik. Dita e 13-të e Lojërave Olimpike që po vijnë për sportdashësit drejtpërdrejt në Rrjetin e Radio-Televizionit Shqiptar, ka nisur pas mesnate me orën e Tiranës me seancën e paradites me orën e Tokios, duke kurorëzuar edhe një kampione të re olimpike, e për më tepër, duke dhuruar një rekord të ri ri botëror.
Amerikania Sidni MekLaflin ka dëshmuar se forma që po kalon nuk është një rastësi, duke bërë një garë të jashtëzakonshme në finalen e 400 m me pengesa për femra dhe duke shkurorëzuar edhe kampionen olimpike në fuqi, bashkëatdhetaren e saj, Dilajla Muhamad. Ishte kjo e fundit që e nisi më vrullshëm garën, por MekLaflin e rriti ritmin në 100 metrat e fundit, duke mbërritur në finish me kohën 51 sekonda e 46 të qindtat.
21-vjeçarja ka thyer kështu rekordin botëror të 51 sekondave dhe 90 të qindtave, që e pati vendosur vetë pak javë më parë në Oregon të Shteteve të Bashkuara të Amerikës. Interesant është fakti se edhe Muhamad arriti në finish me kohën 51 sekonda e 58 të qindtat, që gjithashtu ishte nën kohën e rekordit të vjetër botëror, ndërsa podiumi u plotësua nga Femke Bol e Holandës.
Ajo mbërriti në finish pas dy amerikaneve, me kohën 52 sekonda e 3 të qindtat, një rekord evropian ky në vetvete, që do të kishte thyer edhe rekordin e vjetër olimpik të Melani Uokerit, me 42 sekonda e 64 të qindtat. Ajo që duhet theksuar është se, si në finalen e meshkujve, ashtu edhe atë të femrave në 400 m me pengesa, dy vendet e para ishin me disa të dhjetat e sekondës poshtë rekordit botëror, ndërsa vendi i 3-të regjistroi kohën e 4-t më të shpejtë në histori.
