ASNN – Ende pa nisur mirë merkato e dimrit, Tirana po dëshmon se është një klub që ka dështuar në merkaton e verës. Blerjet “gjigande” të verës po shndërrohen në “liliputë” të pavlefshëm, që as nuk lënë gjurmë në fushën e lojës. Në këto ditë të para të janarit, Tirana është pranë “divorcit” me sulmuesin kryesor të saj, Dejan Blazhevski. Në verë ai erdhi me bujë të madhe dhe klubi e prezantoi me pompozitet, a thua se ishte Kristiano Ronaldo.
Nuk është hera e parë që Tirana prezanton në këtë formë lojtarë që nuk janë as në nivelin mesatar. Në fakt, Blazhevski u pa në fillim të sezonit si zgjidhje, por koha tregoi se Tirana nuk ka në gjirin e saj një sulmues që kapërcen koeficientin 0.3 gola për ndeshje (kufi kritik minimal për një sulmues në kushtet e kampionatit shqiptar) dhe që të kapërcehet ky koeficient, në 18 ndeshje të luajtura një sulmues duhet të shënojë të paktën 6 ose 7 gola, gjë që nuk ka ndodhur.
Blazhevski ka realizuar vetëm 3 gola dhe me ardhjen e trajnerit Ardian Mema nuk ka qenë preferencë, prandaj largimi i tij është pothuajse i sigurt. Madje, mediat sportive shqiptare shkruajnë se sulmuesi pritet të kthehet në vendlindjen e tij, Maqedoni, për të luajtur me një skuadër të kampionatit kryesor të këtij vendi. Nga ana tjetër, Tirana rrezikon të bjerë sërish në gabimet e dikurshme. Duke bërë blerje sa për të kaluar radhën, e për t’i prezantuar si “tigra” të sulmit, ajo ka rënë në “batakun” e ngritur vetë me dritëshkurtësi.
Koha po tregon se blerjet e Tiranës kanë qenë “tigra prej kartoni” dhe të bëra “prej hallit”. Një skuadër nuk e kalon kurrë krizën duke bërë reklamë të rreme dhe dëshmia më e qartë është pozita e skuadrës në renditje. Por, e gjendur në vendin e 8-të me 17 pikë, në zonën e ftohtë të mbijetesës, Tirana ka mundësinë në këtë merkato dimri, më e pakta të bëjë një kthesë mentale, me blerje “për të qenë” jo me “tigra kartoni”.
