ASNN – Trajneri i Tiranës flet para ndeshjes me kurbinasit, kërkon më tepër nga skuadra. Tirana ndeshet të dielën me Laçin, në takimin e parafundit të javës së 4-të të Kategorisë Superiore dhe për trajnerin Orges Shehi, bardheblutë janë gati. “Tirana është një skuadër që është ndërtuar nga e para, – ka thënë ai. – Le të themi 50 % e lojtarëve janë të rinj. Duhet kohë që mekanizmat të jenë 100 për qind funksionalë. Kjo, sepse lojtarët duhet të përshtatet me njëri-tjetrin dhe me klubin.”
“Me çdo gjë të re duhet të përshtatesh. Skuadra e Laçit ka mënyrën e saj dhe bën llogaritë e saj, – ka theksuar ish-portieri. – Pavarësisht të tjerave, ne duhet të jemi këta që kemi treguar veten deri më sot. Të bëjmë ca ndryshime të vogla dhe them se nuk është se kemi bërë keq në këto 4 ndeshje të para të kampionatit dhe Kupës së Shqipërisë.” Për 44-vjeçarin, skuadra ka ende shumë për të dhënë. “Duhet të jemi më agresivë dhe më të këqinj në aspektin futbollistik”, – ka thënë ai.
“Nuk duhet të jemi shumë të lehtë për të lënë kundërshtarin që të na penalizojë, – ka vijuar trajneri i Tiranës. – Do të vlerësojmë çdo top sikur është ai top që të humb ndeshjen apo të jep fitoren. Në futboll çdo gjë ndodh. Ai që merret me këtë punë e di shumë mirë se pikët lihen për disa episode, sepse nuk je i saktë në momentet para porte ose merr gola të evitueshëm. Është fillimi i kampionatit. Do të donim të merrnim më shumë javën e shkuar. Ama çdo gjë iku. Duhet të fokusohemi te Laçi.”
Kreu durrsak i stolit të kryeqytetasve e vlerëson lart Laçin, përtej faktit që kurbinasit kanë marrë vetëm dy pikë në këto 3 javë të para. “Laçi është një kundërshtar i vështirë dhe kjo dihet, – ka pohuar Shehi. – Do të jetë një ndeshje e fortë, se paçka se nuk ka marrë rezultate javët e fundit, ka bërë shumë mirë në ndeshjet evropiane. Ka bërë shumë mirë në ndeshjet e tjera. Në fund të fundit ashtu siç ndodhi vjet është rivali ynë direkt për kampionatin dhe Evropën.” Takimi Tirana-Laçi luhet të dielën, duke nisur nga ora 13:45.
