ASNN – Vllaznia fitoi duelin e tretë gjysmëfinal të “play-off”-it në volejboll për meshkuj, duke mundur sonte Tiranën me sete 3-0. Taklimi i luajtur në Pallatin e Sportit “Qazim Dervishi” të qytetit të Shkodër ishte i rivalizuar dhe emocionues, por shkodranët nuk falën, duke fituar 25-21, 25-20 dhe 29-27 dhe krejt ndeshjen 3-0, duke mundësuar kalimin në finalen e madhe.
Natyrisht, nuk ishte e lehtë, sidomos në setin e tretë ku Tirana i luajti të gjitha “kartat” e sja për të qëndruar në lojë dhe për të tentuar surprizën e madhe, por nuk ia doli. Kjo ishte ndeshja e tretë gjysmëfinale, pasi më parë secila skuadër kishte fituar në fushën e saj dhe rezultati ishte barazuar 1-1, por në duelin e fundit Vllaznia tregoi maturi dhe ia doli të shkojë në finale e madhe të “play-off”-it, ku do të gjejë Partizanin.
Do të jetë një duel mjaft i fortë, pasi Partizani ka bërë përmirësime në lojën e tij dhe ndihet pretendent. Motivimi është rritur pasi në gjysmëfinale të kuqtë e trajnerit Ylli Tomori mposhtën favoritët shijakas, Erzenin, me shifrat 2-0. Në finale do të fitojë ajo skuadër që siguron e para 3 fitore dhe shanset i kanë të dy ekipet, por Partizani ka avantazhin se nuk ka asgjë për të humbur.
Dhe me këtë parim mund të marrë më të mirën e tij. Kurse shkodranët do të tentojnë të ruajë autoritetin e tyre të padiskutuar në volejbollin e meshkujve, pasi kanë në përbërje një grup volejbollistësh të nivelit të lartë dhe emra të spikatur të kampionatit shqiptar të rrjetës.
