ASNN – Klubi bardheblu i kryeqytetit dorëzon në Policinë e Tiranës pamjet filmike të ngjarjes. Futbolli shqiptar vazhdon të përjetojë episode dhune brenda dhe jashtë fushave të blerta këtë sezon dhe më i fundit ka qenë ai që ka ndodhur pas mbylljes së takimit të vlefshëm për javën e 26-të të Kategorisë Superiore midis Tiranës dhe Laçit, që u mbyll në barazim 1-1. Dhe të dielën në mbrëmje, klubi bardheblu i kryeqytetit ka bërë një denoncim publik, të postuar në profilin e klubit në rrjetin social “Facebook”.
“Klubi i Futbollit “Tirana” dënon ashpër ngjarjet e ndodhura dje ne stadiumin “Selman Stërmasi”, – shkruan reagimi i klubit 24 herë kampion i Shqipërisë, që më tej vijon: “Lojtarët e Tiranës u provokuan dhe u dhunuan. Klubi i ka vënë në dispozicion të Policisë së Tiranës pamjet filmike për gjithçka ka ndodhur në përfundim të ndeshjes Tirana-Laçi dhe pret zbardhjen e ngjarjes si dhe pasojat ligjore. Denoncimet publike në këtë vend, thuajse gjithmonë kanë rënë në vesh të shurdhët për të mos sjellë ndryshim.”
“Për këtë dhe te tjera arsye, zgjedhim të mos flasim gjatë, por të veprojmë, – ironizon më tej klubi i Tiranës. – Dy javë më parë, gjyqtari Olsi Sokoli vodhi turpshëm skuadrën në fushë ndaj Kastriotit dhe klubi ka hapur një çështje ndaj tij në FIFA, në sektorin e Luftës kundër Racizmit, në mungesë të një përgjigjeje nga Federata Shqiptare e Futbollit. Dje skuadra u vodh në fushë, në një ndeshje që mund të luhej deri në të gdhirë sipas kryesorit Kridens Meta dhe, më pas, u provokua dhe u godit turpshëm.”
“Pamjet filmike janë depozituar në Policinë e Tiranës. Ngjarjet e dy javëve të fundit do të relatohen gjithashtu në UEFA dhe FIFA”, – përfundon denoncimi publik i Klubit të Futbollit “Tirana”.
