ASNN – Shiu shndërron në moçal “Selman Stërmasin” dhe ndërpret ndeshjen Tirana-Flamurtari. Reshjet e dendura të shiut ndërprenë takimin Tirana-Flamurtari në kuadër të turit të dytë të Kupës së Shqipërisë. Ishte dueli i parë midis tyre në këtë fazë, por nga kjo ndeshje u luajtën vetëm 25 minuta, pasi reshjet e shiut bënë fushën të papërshtatshme dhe terreni i Stadiumit “Selman Stërmasi” ngjante me një liqen.

Në kushtet e të pamundurës, gjyqtari, me miratimin e klubeve dhe me bekimin e delegatit të ndeshjes Lysien Nurishmi, ndërpreu ndeshjen, e cila do të vijojë të enjten në orën 13:30, pikërisht nga minuta e 25-të. Ndërkohë, në ndeshjet e tjera të luajtura ditën e sotme, pati surpriza të mëdha, ku padyshim surpriza më e madhe ishte humbja 1-2 e Kukësit në Fier përballë Apolonisë vendase.

Një rezultat që e vë në vështirësi serioze skuadrën verilindore, një rezultat që nuk e ndihmon për ndeshjen e kthimit dhe ku rrezikon eliminimin. Një tjetër surprizë ishte dhe fitorja e pastër dhe bindëse e Bylisit, 2-0 ndaj Laçit. Një skuadër e Kategorisë së Parë mund një të Superiores dhe kjo ka shumë domethënie. Sidoqoftë, fatet e kualifikimit do të vendosen në duelin e kthimit.

E njëjta gjë vlen dhe për ndeshjen Vllaznia-Kamza, ku shkodranët fituan 2-1, duke i shkaktuar humbje ish-trajnerit Ernest Gjoka, i kontestuar sot në Shkodër. Dy skuadra që hodhën një hap të mirë drejt kualifikimit nga ndeshja e sotme, ishin Luftëtari dhe Teuta. Gjirokastritët fituan 3-0 ndaj Egnatias së Rrogozhinës, një ndeshje e lehtë dhe pa shumë histori, kurse durrsakët fituan ndaj Lushnjës në udhëtim 3-1, duke bërë një hap përpara drejt çerekfinaleve të Kupës së Shqipërisë.

Kupa e Shqipërisë

Turi i 16-shes:

Të martën, 22 janar 2018:

Kastrioti – Partizani              2-4

Besëlidhja – Skënderbeu    1-2

Të mërkurën, 23 janar 2018:

Apolonia – Kukësi                2-1

Bylis – Laçi                             2-0

Egnatia – Luftëtari                0-3

Lushnja – Teuta                    1-3

Vllaznia – Kamza                  2-1

Tirana – Flamurtari               (U shty)

(Ndeshja u pezullua pas minutës së 25-të

për shkak të reshjeve të dendura të shiut,

vazhdon të enjten në ora 13:00)