ASNN – Luftë brenda llojit, SHKBF Tirana mposht SHBF Tiranën dhe ruan kryesimin. Një ndeshje e pazakontë u luajt për herë të dytë të mërkurën në nivelin më të lartë të Kampionatit Kombëtar të Basketbollit të Femrave, që njihet si Grupi A, pasi në kuadër të java e 6-të, u përplasën dy skuadrat e Tiranës, njëra SH.K.B.F. Tirana e tjetra SH.B.F. Tirana, duel që e fitoi e para me rezultatin 84-78.
Ishte një duel midis trajnerit Erdal Borova dhe trajneres Mirza Alibegaj, një duel brenda ngjyrave bardheblu. Që në 10-minutëshin e parë u kuptua qartë se kjo do të ishte një ndeshje me rivalitet, e fituan vajzat e trajnerit Borova 20-19. Në 10-minutëshin e dytë diferencën e bënë vajzat e trajneres Alibegaj, që fituan 27-25. Pra gjithçka në thuajse baraspeshë.
Por në 10-minutëshin e tretë erdhi diferenca e ndeshjes. Skuadra e Borovës fitoi këtë pjesë me shifrat 22-12 dhe ky 10-minutësh rezultoi përcaktues për fatet e ndeshjes. Në 10-minutëshin e katërt dhe të fundit, fitoi Tirana e Alibegajt me shifrat 20-17, por krejt ndeshjen e fitoi SH.K.B.F Tirana me rezultatin 84-78.
Me këtë fitore Tirana e Borovës mban kreun e basketbollit të femrave me 12 pikë, kurse Tirana e Alibegajt mbetet e dyta me 10 pikë, por të dyja Tiranat po i japin tonin kampionatit shqiptar të koshit të femrave këtë sezon. Në ndeshjet e tjera të javës së 6-të, Flamurtari fitoi në udhëtim ndaj Elbasanit me shifrat 74-63, kurse Studenti u thye në kryeqytet nga Vllaznia 76-84.
Ngjitja e Vllaznisë në vend të tretë me 10 pikë po e bën kampionatin mjaft interesant, sepse Flamurtari ka mbetur në vend të katërt me 9 pikë dhe gara për titullin duket gjithnjë e më e ndërlikuar, pavarësisht dominimit të dy skuadrave të Tiranës.
Kampionati Kombëtar
i Basketbollit – Femra
Java e 6-të
Të mërkurën:
Studenti – Vllaznia 76-84
Elbasani – Flamurtari 63-74
SH.B.F. Tirana – SH.K.B.F. Tirana 78-84
Renditja:
Nr. Skuadra N. F. H. Pikë
- SH.K.B.F. Tirana 6 6 0 12
- SH.B.F. Tirana 6 4 2 10
- Vllaznia 6 4 2 10
- Flamurtari 6 3 3 9
- Studenti 6 1 5 7
- Elbasani 6 0 6 6
