ASNN – Ajo që nisi në ditët e fundit të tetorit të vitit të shkuar dhe, që premtoi madje edhe një revolucion bardheblu, ka marrë fund zyrtarisht sot. Ilir Daja nuk do të jetë më trajner i Tiranës. Lajmin e ka konfirmuar vetë trajneri i bardhebluve, nëpërmjet një deklarate të botuar në faqen zyrtare të Klubit të Futbollit “Tirana”. Shkaku kryesor i largimit të tij, ka qenë mosarritja e objektivit, pra Tirana në Kupat e Evropës.

“Kështu kishim vendosur me presidentin Halili që ne marrjen e drejtimit, me fillimin e fazës së dytë të kampionatit, që, nëse nuk e arrij Evropën, do të largohem nga skuadra, – shkruhet në deklaratë. – Investimi sportiv i bërë në fillim të sezonit me afrimin e futbollisteve cilësorë, si dhe investimi i bërë në infrastrukturë, më krijoi besimin se objektivi ishte i realizueshëm.”

“Rezultatet që skuadra mori në këtë periudhë, ishin pozitive dhe motivuese për të arritur në fund aty ku të gjithë dëshironim, – ka vijuar ish-trajneri që është shpallu, në të shkuarën, edhe kampion i Shqipërisë me Dinamon. Dëmtimet e shumta në mesin e sezonit, pas muajit janar, dëmtime të cilat erdhën për shkak të fatit të keq, kushtëzuan ecurinë e skuadrës deri në përfundim t’ sezonit.”

“Kam premtuar publikisht që do të jap dorëheqjen nëse Tirana nuk arrin të sigurojë Evropën dhe sot po e jap atë”, – ka përfunduar deklaratën e tij për shtyp trajner Ilir Daja, i cili ka falënderuar në fund presidentin, skuadrën, stafin me të cilin ka punuar dhe padiskutim tifozët për të gjithë mbështetje që i ka dhënë.