ASNN – Tirana bie në Krujë mes tensionit e përplasjeve fizike, Kastrioti merr 3 pikë që e afrojnë me mbijetesën. Tirana pësoi të dielën një humbje në Stadiumin “Redi Maloku” të Fushë-Krujës, ku u mund nga Kastrioti me rezultatin e ngushtë 1-0. Më shumë sesa ndeshja dhe rezultati, në këtë sfidë tërhoqi vëmendjen përplasja e Tiranës me tifozerinë vendase, goditjet e lojtarëve të Tiranës dhe natyrisht, vendimet e dyshimta të gjyqtarit Sokoli.

Ndeshja u zhvillua në një fushë të papërshtatshme, sepse terreni nuk plotëson kriteret për të luajtur nivel elitar futbolli, ndërsa menjëherë pas ndeshjes sulmuesi kryesor i Tiranës, Majkëll Ngo, u provokua nga vendasit dhe për pak sa nuk doli me karton të kuq. Për të evituar ndonjë karton që ndëshkonte skuadrën, trajneri Mema e zëvendësoi atë. Megjithatë, për Tiranën gjërat shkuan keq e më keq në këtë ndeshje, qoftë nga vendimet e diskutueshme të gjyqtarit, por edhe nga përplasjet e vazhdueshme me lojtarët vendas.

Në minutën e 27-të erdhi goli për Kastriotin, i shënuar nga Marku me 11-metërsh, një gol që rezultoi vendimtar për fatet e takimit dhe të fitores së krutanëve. Edhe pse Tirana u përpoq mjaft të baraspeshonte lojën në pjesën e dytë, nuk ia doli dhe në fund fitoi skuadra krutane me rezultatin 1-0, duke marrë një 3-pikësh që e çon në 24 pikë, vetëm 4 pikë më pak se Luftëtari një vend më lart, domethënë i parafundit dhe 5 pikë më pak se Tirana që ndodhet në vend të shtatë.

Në fund të ndeshjes pati tension, pasi, në një moment që trajneri Mema i afrohet gjyqtarit të ndeshjes për t’i kërkuar sqarime, ai pengohet nga policët, por më keq akoma, konstatohet se është goditur në fushë sulmuesi Grent Halili i Tiranës, i cili është djali i presidentit të skuadrës bardheblu, Refik Halilit. Pritet që ngjarjet e Fushë-Krujës të jenë objekt i Komisionit të Disiplinës.

Kategoria Superiore

Java e 25-të

Të shtunën:

Skënderbeu – Kukësi          1-0

Të dielën:

Laçi – Flamurtari                   0-0

Kastrioti – Tirana                   1-0

Partizai – Teuta                     (17:00)

Luftëtari – Kamza                  3-0 (në tavolinë)

Renditja

Nr.       Skuadra         N.        F.         B.        H.        Gsh-Gp          Pikë

1. Partizani        24        15          5         4        26-11              50
2. Kukësi            25        13          5          7        27-16              44
3. Teuta              24        10        10          4        30-19              40
4. Skënderbeu  25        11          4        10        27-23              37
5. Laçi                 25          9        10          6        20-19              37
6. Flamurtari      25          9          8          8        21-19              35
7. Tirana             25          7          8        10        28-26              29
8. Luftëtari         24          7          4        13        20-30              25
9. Kastrioti          25          7          3        15        22-41              24
10. Kamza 24          4          5        15        13-30              17