ASNN – Skuadra e tij fitoi me përmbysje ndaj Dinamos dhe për trajnerin e Tiranës, Julian Ahmataj, kjo fitore do t’u japë frymëmarrje dhe qetës. “Ishte ndeshja e parë dhe duhet ta fillonim mbarë duhet të punojmë shumë dhe t’i rregullojmë gabimet në të ardhmen, – ka deklaruar ai, duke folur pas ndeshjes. – Kjo periudhë e shkëputjes s’na ka ndikuar pozitivisht, mungesa e ndeshjeve në vazhdimësi i ka dhënë ftohje futbollistëve. Ne kemi shumë lojtarë me cilësi që nuk janë 100% e tyre por duhet të përmirësohen.”
“Duhet të jemi bashku se dhe lojtarët e stolit dhanë një ndihmë të madhe dhe e dërguan skuadrën drejt fitores, – ka vijuar Ahmataj. – Ne kemi potencial, na duhet qetësi dhe punë, presionin duhet ta ketë trajneri, futbollistët të jenë të qetë.” Më tej, trajneri u është përgjigjur edhe kritikëve të tij, duke thënë: “Deri këtu ku unë jam nuk është se kam arritur se më ka ndihmuar dikush, nuk më mbështet njeri, do punoj fort dhe e meritoj këtë që kam arritur, nuk i frikësohem një situate të tillë.”
“Duhet vetëm stabilitet për të dërguar skuadrën tek suksesi, duhet të nxjerrim në pah cilësitë e tyre, – ka vijuar Ahmataj. – Mendoj që afrimet e janarit janë me pikatore dhe kundërshtari ka bërë afrime dhe smendoj se ka prurje të mirë. Kemi parë disa pista por do bëhet nëse na mbushet mendja që duhet të plotësojnë, po shohim dhe po përdorim futbollistë të akademisë. Ka një brez të artë Tirana për të ardhmen por gjithmonë duke qenë të kujdesshëm, duhet në masë.”
“Patrik është bashkuar me skuadrën në stërvitje këtë javë, i duhen minimalisht dhe dy javë të tjera, ai ka munguar gjithë pjesën e parë të sezonit dhe mund të jetë plotësues i mirë”, – ka përfunduar trajneri i Tiranës, Julian Ahmataj.
