ASNN – Pëson gol në fund dhe mundet 0-1 përballë Shamrok Rovers, por shpreson në kthim. Skuadra tjetër shqiptare që ka mbetur në garë në veprimtarinë e 3-të të klubeve të kontinentit, Ligës së Konferencës, Teuta, ka zhvilluar gjithashtu të enjten në mbrëmje ndeshjen e pare të turit të 3-të, duke u përballur në Irlandë me Shamrok Rovers. Ndeshja, që është luajtur në Stadiumin “Tallagt” të Dablinit dhe është sjellë për sportdashësit drejtpërdrejt nga Rrjeti i Radio-Televizionit Shqiptar, në kanalin RTSH 1, ka qenë një përballje e luajtur nën nivelin mesatar.
Ndonëse Seferi jep shenja të mira pas 3 miutash lojë, niset në kundërsulm por nuk arrin të kalojë mbrojtësin e fundit të vendasve, i cili i heq topin nga këmbët, çerekora e parë ka qenë e qetë. Rasti i parë i rrezikshëm për Shamrokun do të vijë në minutën e 20-të, me anë të Mandroiu, por tentativa e tij u ndal mjaft bukur nga Stivi Frashëri, teksa ishin pranë golit vendasit. 7 minuta më pas, tjetër përpjekje e rrezikshme e Shamrokut, me topin që harkohet nga e majta, drejt zonës, por kontrollon gjithçka portieri Frashëri.
Gjashtë minuta para fundit të pjesës së parë, provojnë të rrezikojnë durrsakët sërish me Taulant Seferin, por tentativa e sulmuesit të Kombëtares, ndalet nga mbrojtësit vendas. Me rrjeta të paprekura do të mbyllet pjesa e parë, ndërsa e njëjta tablo është edhe në të dytën, ndonëse në çerekoren e parë, është pranë golit Shamroku, por vendimtar Stivi Frashëri, që me pritjen e tij pas një harkimi nga këndi, i mohon avantazhin irlandezëve në minutën e 50-të. 5 minuta më pas, vendasit pretendojnë për 11-metërsh, pas rrëzimit të Uotsit brenda zonës.
Por për gjyqtarin, ndërhyrja e Arapit konsiderohet e rregullt. Vendasit janë hedhur të gjithë në sulm në kërkim të golit të avantazhit, por mbrohen mirë durrsakët dhe kjo vlen deri në minutën e fundit të kohës së rregullt. Por, në minutën e parë shtesë nga 6 të tilla, irlandezët gjejnë golin. Teuta është shtangur nga goli dhe nuk arrin të reagojë dhe pëson kështu një humbje minimale në ndeshjen e parë në Irlandë përballë Shamrok Rovers, një rezultat ky që sidoqoftë jep shpresë për një përmbysje në ndeshjen e kthimit pas një jave në Durrës.
