ASNN – Teuta gjen fitoren pas 40 ditësh, i afrohet Kukësit të vendit të dytë. Teuta priti sot në Stadiumin “Niko Dovana” të Durrësit, Kastriotin, në kuadër të javës së 26-të të Kategorisë Superiore. ishte një duel mjaft i vështirë për skuadrën e trajnerit Bledi Shkëmbi, pasi vinte prej një periudhe të gjatë që nuk fitonte, mbi një muaj. Megjithatë, Teuta u kthye sot tek fitorja, pasi mundi krutanët 1-0, me një autogol të shënuar nga Julian Shehu në minutën e 24-t.

Në fakt, Teuta e meritoi fitoren, pasi ishte dominuese në çdo aspekt. Skuadrës durrsake i duhej me patjetër fitorja dhe në një farë mase ia doli, edhe pse me një autogol, pasi në këtë lojë ka vlerë rezultati dhe “djemtë e detit” ia dolën të merrnin atë që kishin objektiv. Natyrisht, fitorja me vlerë tri pikë e ngjit teutën në kuotën e 43 pikëve, në vend të tretë, por tashmë me vetëm dy pikë larg vendit të dytë që mbahet nga Kukësi. Kurse Kastrioti me këtë humbje vihet në vështirësi serioze, sepse mbetet në kuotën e 24 pikëve dhe në vend të fundit.

Kalendari në javët e ardhshme është akoma më i vështirë për Kastriotin dhe që të mbijetojë duhet të paktën të mundë në ndeshjet e mbetura dy rivalët e saj dhe të përfitojë sa më shumë pikë nga duelet e tjera, në të kundërt rënia nga kategoria është e pashmangshme. Fitorja e Luftëtarit sot ndaj Skënderbeut, e ka vendosur Kastriotin në pozita akoma më të vështira, ndërsa ka futur në ankth dhe në vallen e mbijetesës edhe Tiranën, prandaj gara e fund-tabelës do të bëhet akoma më e fortë dhe më enigmatike në javët e mbetura të këtij sezoni.

Kategoria Superiore

Java e 26-të

Të premten, 29 mars 2019:

Kukësi – Partizani                1-1

Të shtunën, 30 mars 2019:           

Luftëtari – Skënderbeu        1-0

Tirana – Laçi                          1-1

Teuta – Kastrioti                    1-0

Flamurtari – Kamza              3-0 (në tavolinë)

Renditja

Nr.       Skuadra         N.        F.         B.        H.        Gsh-Gp          Pikë

1. Partizani        26        16          6          4           30-12           54
2. Kukësi            26        13          6          7           28-17           45
3.        Teuta              26        11        10          5           31-22           43
4. Laçi                 26          9        11          6           21-20           38
5. Flamurtari      26        10          8          8           24-19           38
6. Skëndërbeu  26        11          4        11           27-24           37
7. Luftëtari         26          9          4        13           24-30           31
8. Tirana             26          7          9        10           29-27           30
9. Kastrioti          26          7          3        16           22-42           24
10. Kamza 25          4          5        17           13-36           17