ASNN – Kampionia në fuqi, Skënderbeu, ka pësuar të shtunën humbjen e dytë në këto 6 javë të sezonit të ri të Kategorisë Superiore, ku ka korrur 3 fitore dhe është ndalur në një barazim pa gola, pasi është mundur në Durrës nga Teuta vendase me rezultatin 2-0. Në fakt, fati i këtij takimi, që u soll për sportdashësit drejtpërdrejt dhe ekskluzivisht nga Rrjeti i Radio-Televizionit Shqiptar, u vulos që në 36 minutat e para të tij, kur durrsakët e drejtuar nga trajneri Hasan Lika gjetën dy herë rrugën e rrjetës.

Peposhi e ka mposhtur i pari Orges Shehin, portierin durrsak të korçarëve, në minutën e 25-të, ndërsa 11 minuta më pas, Krasniqi ekzekuton mjeshtërish një goditje nga larg, duke përshëndetur rrjetën e portës së Skënderbeut. Pavarsisht se ka patur afro një orë lojë në dispozicion, skuadra e Mirel Josës nuk ka qenë në gjendje të shfrytëzojë as epërsinë numerike që prej minutës së 65-të, pas daljes së Bledar Hodos me karton të kuq dhe Teuta fiton me rezultatin 2-0.

Në takimin tjetër të së dielës mbrëma, Laçi e ka ndalur Flamurtarin në një barazim 1-1 në Vlorë, ndërsa më herë, Vllaznia ka mundur në Shkodër Elbasanin. Kategoria Superiore i ka luajtur të premten dy ndeshjet e para të javës së saj të 6-të dhe Apolonia është mundur minimalisht në Fier, 0-1 nga Kukësi. Ndërkaq, në mbrëmje është luajtur derbi i madh i kryeqytetit, midis Tiranës dhe Partizanit, që është mbyllur me rrjeta të paprekura.

Vetë derbi është luajtur pa tifozë, pasi Tirana është ndëshkuar nga Federata Shqiptare e Futbollit me 15 ndeshje pa tifozë. Renditjen e Kategorisë Superiore e kryesojnë Flam

urtari, Tirana, Vllaznia dhe Partizani, me nga 11 pikë secila, të ndjekura nga Kukësi dhe Skënderbeu, me nga 10 pikë secila.