ASNN – Teuta ka regjistruar sot një prej fitoreve më të rëndësishme në këtë kampionat, pasi mundi 2-1 në një duel direkt për vendin e dytë Kukësin, skuadrën e cila shihej si një nga favoritët për të fituar trofeun e kampionatit. Natyrisht, disfata e së premtes në Durrës e nxjerr skuadrën e trajnerit Armando Cungu përkohësisht nga objektivat kryesore, sepse diferenca me Partizanin ndjekës është 8 pikë dhe mund të shkojë të dielën në 11 pikë nëse të kuqtë e fitojnë duelin e tyre me Laçin. Ndeshja që u luajt sot në Durrës ishte një nga më të bukurat e këtij edicioni.

Kishte rivalitet, emocione dhe spektakël. Kjo ndeshje pati gola, pati 11-metërsh të shkuar dëm, raste të shpërdoruara dhe kartonë të verdhë e të kuq, pothuajse nuk i mungoi asgjë dhe ishte një ndeshje për “kartolinë” për kampionatin shqiptar të këtij sezoni. Fitoi skuadra e Bledi Shkëmbit 2-1, një fitore që vjen pas 5 barazimesh radhazi dhe që kishte vënë në dyshim aftësinë e skuadrës durrsake për të ruajtur ritmin e konkurrencës në zonën e kryesimit. Në fakt, ndeshja e sotme në “Niko Dovana” nisi më mirë për Kukësin, i cili gjeti golin i pari me anë të Rexhinaldos.

Ishte paralajmëruar nga verilindorët se në këtë ndeshje prioritetin e sulmit do ta kishte pikërisht mozambikasi e jo vlonjati Vasil Shkurtaj. Në minutën e 30-të Teuta, e cila deri në atë moment po ushtronte më shumë presion, pretendoi një 11-metërsh, pasi Dzaria i Kukësit ndërhyri me faull ndaj Kamarës, por për gjyqtarin ishte gjithçka në rregull, pavarësisht se durrsakët këmbëngulnin për 11-metërsh. Në minutën e 36-të, në kulmin e lojës së Teutës vjen ndëshkimi. Rexhinaldos i krijohet hapësirë dhe me një gjuajtje të saktë nga distanca mozambikasi “përshëndet” rrjetën.

1-0 për Kukësin dhe pjesa e parë mbyllet me këtë rezultat. Në pjesën e dytë nisi loja e nervave. Kukësi dëshiroi ta ruajë epërsinë dhe të godasë në kundërsulm. Me kalimin e minutave Shkëmbi insiston tek të tijtë të shtyjnë përpara dhe të ushtrojnë preson. Dhe brenda 3 minutash, midis asaj të 69-të dhe asaj të 72-të, ndodhi përmbysja e madhe. Fillimisht Gerhard Progni e më pas edhe Arapi,  përmbysën Kukësin në 2-1, duke vënë në siklet trajnerin Cungu, që nxitoi të fuste yjet e stolit në fushë. Futen njëherësh Shkurtaj, Rama dhe Çyrbja, me synimin për të mos dalë pa pikë.

Dhe forca sulmuese e Kukësit rritet ndjeshëm, ku i afrohet disa herë golit, por finalizimi i sulmuesve mungon. Në minutën e 84-t ishte një rast shumë i mirë, por portiere Hidi i Teutës devijoi dhe topi u përplas në shtyllë e përfundoi jashtë. Megjithatë, Kukësi arrin ta fitojë një 11-metërsh në minutat e fundit të lojës, pasi Osmani preku topin me dorë. Nga pika e bardhë e 11-metërshit Uilliam Kardeiro gjuajti shumë keq dhe Isli Hidi bëri mrekullinë, duke i dhënë 3 pikë Teutës.

Kategoria Superiore

Java e 22-të

Të premten, 15 shkurt 2019:

Teuta – Kukësi                      2-1

Të dielën, 17 shkurt 2019:

Tirana – Luftëtari                   (17:00)

Flamurtari – Skënderbeu    (17:00)

Laçi – Partizani                     (14:00)

Kamza – Kastrioti                  (14:00)

Renditja:

1. Partizani             46
2. Teuta             39
3. Kukësi             38
4. Skënderbeu 33
5. Laçi 31
6. Flamurtari 30
7. Tirana             24
8. Luftëtari             21
9. Kamza             16
10. Kastrioti 16