ASNN – Rafael Nadal është “i sigurt”, se ai do të jetë 100 % i aftë në prag të Turneut të Hapur të Australisë (Australian Open), që nis në më pak se tre javë. Atij i është dashur të bëjë një betejë të ashpër me dëmtimet gjatë muajve të fundit. Numri dy i botës në tenis, duhet të japë maksimumin në fillim të sezonit të ri, kur dihet që nuk ka luajtur që nga shtatori, kur u tërhoq nga gjysmëfinalja e “US Open”, kundër Huan Martin del Potros, për shkak të dëmtimit në kyçin e këmbës.
Pas operacionit, ai ka nisur stërvitjen vetëm dy javë më parë. Nadali do t’i provojë këmbët e tij në garën që zhvillohet në Mubadala në Abu Dhabi, ku ai do të përballet me Kevin Anderson ose Çang Hjeon. “Unë fillova dy javë më parë dhe natyrisht që i bëj gjërat hap pas hapi dhe mendoj se kam kohë që të jem gati për Melbërnin në 100 %-ëshin tim,” u tha Nadal gazetarëve në kryeqytetin e Emirateve të Bashkuara Arabe. – Do ta provoj veten disa ndeshje më parë.”
“Por jam i bindur se do të arrij në Melbërn me gjendjen e duhur”, – ka shtuar spanjolli. Në Abu Dabi, së bashku me Nadalin do të jetë edhe ai që i rrëmbeu kreun e renditjes, Novak Gjokoviçi. Tenisti serb është fitues i Uimbëlldonit dhe “US Open” dhe do të kërkojë të fitojë për të 3-tën herë radhazi “Australian Open” në janar. Gjokoviçi, e ka kaluar periudhën e keqe dyvjeçare që përjetoi që nga 2016. Tani ai ka rigjetur mënyra të ndryshme për të arritur kënaqësi nga sporti.
“Ndjej se nuk kam përparësi suksesin në fushën e tenisit siç bëra deri në 5 vjet më parë, – tha Gjokoviçi. – Për mua, tenisi është më shumë një platformë tani për gjëra të tjera, për vlerat dhe mesazhet që dua të ndaj me brezin e ri.” Gjokoviçi do të ndeshet në Abu Dabi me Karen Khaçanovin ose Dominik Timin.
