ASNN – Tenisti Endi Mërrej ka rezultuar pozitiv me virusin korona dhe rrezikon të mos marrë pjesë në “Australian Open”, turneun e parë madhor (Grend Slam) të sezonit. Lajmi është publikuar në shtypin britanik, sipas të cilit, Murray është tashmë në karantinë, i vetëizoluar në shtëpi dhe gëzon shëndet të mirë.

Këtë javë Murrej duhej të shkonte në Melbërn, për “Grend Slem”-in e parë të vitit. Por tashmë i duhet të shtyjë udhëtimin. Ai do të mund të udhëtojë vetëm kur të jetë plotësisht i sigurt se e ka kapërcyer “Covid-19” dhe do të lejohet nga autoritetet shëndetësore dhe vendore të udhëtojë.

Kështu, tenisti britanik ka rezultuar pozitiv me “Covid-19”, vetëm 3 javë nga fillimi i Turneut të Hapur të Australisë (Australian Open), që nis më 8 shkurt 2021. Ish-numri 1 në botë do të merrte pjesë në këtë event falë një ftese të veçantë (wild card) nga ana e organizatorëve, por tashmë prania e tij në këtë turne është në dyshim.

Mërrej duhej të udhëtonte këto ditë drejt Melburnit me një avion të posaçëm (charter) të vënë në dispozicion nga organizatorët. Më pas ai do të qëndronte dy javë në izolim, si të gjithë pjesëmarrësit, për të zbatuar protokollin anti-“Covid-19” të vendosur në Australi.

Megjithatë, nisja është shtyrë tashmë ose mund të anullohet përfundimisht, pasi tenisti ndodhet në izolim në shtëpinë e tij dhe nuk dihet nëse do të udhëtojë për në Melbërn.