ASNN – Kategoria Superiore e Kampionatit Kombëtar të Futbollit rikthehet të dielën me dy ndeshjet e para të javës së saj të 32-të, të cilat luhen të dyja në të njëjtin ora, duke nisur nga ora 17:45. Në Gjirokastër, Luftëtari që ka rënë më herët edhe matematikisht nga niveli më i lartë i futbollit shqiptar, pret Vllazninë, me shkodranët që duken gjithnjë e më të destinuar të shkojnë në “play-off”-in e mbijetesës me më të mirën e vendeve të dyta të Kategorisë së Parë.
Me vendasit në teori të pamotivuar dhe me Bylisin që përballet të hënën me kampionen në fuqi, Partizanin, që synon Evropën, Vllaznia do të synojë të marrë 3 pikët e plota në Gjirokastër, për t’iu afruar ballshiotëve dhe për të rihapur me ta betejën për vendin e 8-të. Në takimin tjetër të mbrëmjes, Laçi pret në fushën e vet Flamurtarin gjithashtu të rënë edhe matematikisht nga Superiorja, duke synuar të mos bëjë hap fals në shtëpi dhe duke kërkuar të mbetet në luftën për vendin e 3-të.
Një vend i 3-të që mbahet nga Teuta, e cila përballet të hënën në mbrëmje në Durrës, në takimin që nis në ora 20:45, me Skënderbeun, i cili gjithashtu e synon Evropën, duke shpresuar tek fitimi i Kupës nga njëra prej 3 skuadrave që mbajnë kreun e renditjes, por edhe tek një vendim pozitiv i Gjykatës Federale në Zvicër, sa i përket apelimit të dënimit 10-vjeçar të UEFA-s. Një duel interesant është ai që do të luhet të hënën në Ballsh, midis Bylisit dhe Partizanit, dy skuadrave që e synojnë Evropën në rrugë të ndryshme.
Ballshiotët e fituan 2-1 atë takim të shumëpërfolur të parë të gjysmëfinaleve të Kupës së Shqipërisë me Tiranën, ndërsa të kuqtë kryeqytetas janë në një betejë 3-she me Laçin dhe Skënderbeun, duke shpresuar tek fitimi i Kupës nga njëra prej 3 skuadrave që mbajnë kreun e renditjes. Natyrisht, takimi më i spikatur i javës është ai që do të luhet të hënën në kryeqytet, duke nisur nga ora 17:45, midis Tiranës dhe Kukësit, një përballje kjo që mund të vendosë shumëçka, sa u përket fateve të sezonit.
Teksa kanë mbetur edhe 5 javë për t’u luajtur, pra, janë edhe 15 pikë në lojë, bardheblutë kryesojnë të shkëputur 9 pikë nga verilindorët dhe një fitore të hënën në përballjen midis tyre, do ta çonte skuadrën kryeqytetase edhe matematikisht tek titulli “kampion”. Nga ana tjetër, një fitore e Kukësit do ta rihapte betejën për titull, ndërsa barazimi do t’i shkonte sidoqoftë për shtat Tiranës, që do të kishte luksin e administrimit të një epërsie prej 9 pikësh në krye, kur mbeten pastaj edhe 12 pikë në lojë.
