ASNN – Sep Blateri do të vazhdojë që të paguhet nga FIFA, pavarësisht dënimit me 8 vjet pezullim nga të gjitha aktivitetet. Ai që e deklaroi këtë ishte zëdhënësi i FIFA, Andreas Bantel. “Deri në momentin e zgjedhjes së presidentit të ri më 26 shkurt, Blateri është ende në këtë detyrë pasi kështu është në kontratën e tij”, – tha Bantel. Më 8 tetor, Blateri u pezullua me 90 ditë, dënim ky që u rrit në 8 vjet për shkak të pagesës prej 1.8 milionë eurosh për llogari të Mishel Platinisë në vitin 2011.
Sipas Komisionit të Auditit të FIFA-s, për Blaterin mund të bllokohet dhënia e shpërblimeve të ndryshme, por nuk mund t’i mohohet paga pasi kjo është pjesë e kontratës që ai ka nënshkruar. Ndërkohë, edhe UEFA ka konfirmuar se presidenti i pezulluar, Mishel Platini do të vazhdojë të marrë pagën e tij “deri në njoftimin e ardhshëm”. Platini është përjashtuar për 8 vjet nga çdo aktivitet që ka lidhje me futbollin, pas hetimeve ndaj tij.
Bëhet fjalë për një pagesë prej 1.8 milionë dollarëve që kishte pranuar ai nga presidenti i FIFA-s, Sep Blater. “Platini është duke e pranuar pagën nga UEFA dhe do të vazhdojë të paguhet deri në njoftimin e ardhshëm”, ka njoftuar organizmi që qeveris futbollin kontinental. Federata Ndërkombëtare e Futbollit (FIFA) është përfshirë në një krizë të thellë për shkak të skandalit të korrupsionit që ka sjellë edhe vendosjen e 41 personave nën akuzë nga ana e SHBA për veprime ilegale.
Prokuroria amerikane po vijon hetimet e saj, ndërkohe që edhe drejtësia zvicerane po e bën një gjë të tillë paralelisht. Vetëm javën e kaluar, FIFA shkarkoi nga detyra e Sekretarin e Përgjithshëm, Zherom Valke, për shkak të përfshirjes së këtij të fundit në një skemë të shitjes së paligjshme të biletave të Botërorit të vitit 2014. Ky skandal i FIFA ka bërë që qeveria e futbollit botëror në vitin 2015 të raportojë një bilanc me humbje financiare, gjë që ndodh për herë të parë për këtë institucion që nga viti 2001.
