ASNN – Arsenali, Vijareali dhe Eintrahti i Frankfurtit, në kohë të rregullt, Sllavia e Pragës dhe Benfika, pas 120 minutave. Veprimtaria e dytë e klubeve të kontinentit, Liga e Evropës, ka luajtur të enjten ndeshjet e kthimit të turit të 16-shes dhe Rrjeti i Radio-Televizionit Shqiptar ka sjellë për sportdashësit drejtpërdrejt takimin më të spikatur atë të orës 21:00, midis Interit dhe Eintrahtit të Frankfurtit.

Takimi i parë midis këtyre dy skuadrave, që u luajt të enjten e shkuar, u mbyll me rrjeta të paprekura, duke bërë që gjithçka të vendoset në ndeshjen e kthimit në “San Siro”, aty ku fituan gjermanët me një gol të vetëm. Në takimet e tjera, që u luajtën duke nisur nga ora 21:00, Arsenali ka arritur të përmbysë atë humbje 1-3 të pësuar me Renën në takimin e parë, duke i mundur 3-0 në Londër francezët dhe duke u kualifikuar për më tej.

Zeniti i Shën Pjetërburgut nuk ka arritur ta përmbysë humbjen 1-3 të ndeshjes së parë, teksa është mundur edhe në ndeshjen e kthimit me Vijarealin, me rezultatin 1-2. Më të barazpeshuara kanë dy përballjet e tjera të mbrëmjes. Sllavia e Pragës priti në Republikën Çeke Seviljen, pasi ka marrë një barazim 2-2 në Spanjë para një jave dhe takimi i kthimit u mbyll me të njëjtat shifra në kohën e rregullt.

Kohët shtesë kanë qenë edhe më dramatike, pasi spanjollët kanë kaluar sërish në epërsi, 3-2, por çekët kanë përmbysur gjithçka me dy gola të tjerë, duke fituar 4-3 dhe duke shkuar në çerekfinale. Ndërsa një tjetër skuadër iberike, Benfika, ia ka arritur ta zhbëjë në shtëpi atë humbje minimale të pësuar para një jave në Kroaci, në takimin e parë përballë Dinamos së Zagrebit.

Po portugezët ia kanë dalë të kualifikohen vetëm falë dy golave në kohët shtesë, teksa kohën e rregullt e kishin mbyllur me fitoren 1-0. Sikundër gjatë gjithë këtij sezoni, përveç takimit midis Interit dhe Eintrahtit të Frankfurtit, Rrjeti i Radio-Televizionit Shqiptar ka sjellë në kanalin RTSH Sport dhe të gjithë golat e 8 takimeve të kthimit të turit të 16-shes.

Liga e Evropës

Ndeshjet e kthimit të turit të 16-shes

(Në kllapa është shënuar

rezultati i ndeshjeve të para)

Dinamo Kiev – Çellsi                       0-5      (0-3)

Salcburg – Napoli                             3-1      (0-3)

Arsenal – Renë                                 3-0      (1-3)

Krasnodar – Valencia                      1-1      (1-2)

Benfika – Dinamo Zagreb               3-0      (0-1)

Sllavia Pragë – Sevilja                     4-3      (2-2)

Inter – Eintraht Frankfurt                 0-1      (0-0)

Vijareal – Zenit Shën Pjetërburg    2-1      (3-1)

Skuadrat çerekfinaliste:

Çellsi

Napoli

Arsenali

Valencia

Benfika

Sllavia Pragë

Eintraht Frankfurt

Vijareal