Mjeshtëri i Taekuondosë ITF, me brezin e zi “6 dan”, në kategorinë e peshës trupore deri në 70 kg ka ardhur me dy medalje nga veprimtaria e mbajtur në Kishinjev të Moldavisë. Bujar Çaushi, mjeshtëri i Taekuondosë ITF, me brezin e zi “6 dan” në peshën 70 kg është Kampion dhe nënkampion Evrope. Kështu ka ndodhur në Kampionatin Evropian, që u zhvillua në Kishinjev të Moldavisë, nga data 23, deri më 27 korrik 2015.
Në fakt kjo ka qenë një veprimtari e parashikuar në kalendarin vjetor të Federatës Shqiptare të Taekuondosë. Por për mungesë fondesh, gjithnjë sipas informacionit që ka mbërritur dje nga Federata Shqiptare e Taekuondosë, Shqipëria nga pesë sportistë të parashikuar ka pasur vetëm një pjesëmarrës, që ishte Bujar Çaushi. Në Kampionatin Evropian të Kishinjevit kanë marrë pjesë 30 shtete, të cilat sollën 400 sportistë profesionistë, që kishin breza të zinj, nga “1 dan” deri në “6 dan”.
Garat konkurruese në këtë kampionat ishin dyluftimet, ushtrimet, teknikë speciale dhe teknikë force. Eksperienca disavjeçare e këtij mjeshtri, por mbi të gjitha përgatitja tre mujore përpara kampionatit bën të mundur dhe suksesin e tij me një medalje të artë dhe një të argjendtë. Nuk duhet harruar që Çaushaj ka bërë një stërvitje intensive 70-ditëshe në Shqipëri, si dhe 20 ditë jashtë vendit. Dhe, duke qenë se është me gradën “6 dan”, Çaushaj stërvitjet e fundit i ka bërë me trajnerët Trevor Nikolls, brezi i zi 9 dan, dhe Maurizio Trojano brezi i ri 7 dan. Ndërkaq pjesëtarëve të tjerë të kësaj Federate si Ardian Çaushaj, që është presidenti i Federatës Shqiptare të Taekondosë, Xhekson Titinit, Emiljan Kukës, Ani Fekollarit, Donjan Zhapajt, Manuel Gaxhajt dhe Elefteria Papadhopulit nuk iu dha mundësia për të konkurruar në këtë garë. “Aktivitetet e ndryshme, si dhe eksperienca mbresëlënëse me fitoret në Kampionatin Evropian na stimulojnë që të jemi të organizuar dhe të vazhdojmë aktivitetet tona për vitin në vazhdim”, ka përfunduar Bujar Çaushaj, Kampion dhe Nënkampion Evrope në Kisinau të Moldavisë.
