ASNN – Çështja e përzgjedhjes së sportistëve në ekipet e Shqipërisë në veprimtaritë madhore sportive ka dalë përsëri në pah, pasi është Federata e Taekuondosë në version “World” ajo që ka marrë një vendim që i ka mohuar njërës prej sportisteve më të spikatura pjesëmarrjen në Kampionatin Evropian. Kryesia e kësaj Federate i ka mohuar Ada Demnerit vendin në delegacionin kuqezi në Evropianin e majit, që do të zhvillohet në Montró të Zvicrës.
Motivacioni i këtij vendimi është mospërmbushja e kritereve teknike për nivelin e kërkuar në këtë Evropian. Ky motivacion bie ndesh me realitetin, pas Demneri, që stërvitet nga trajneri i saj, Leo Kapri, është e vetmja sportiste shqiptare që ka marrë medalje ari në Ballkan, si dhe ka konkurruar denjësisht, duke marrë edhe medalje, në turnetë G1 dhe G2 të njohura dhe të vlerësuar nga Federata Botërore e Taekuondosë (World).
Kjo sportiste aktualisht ndodhet në vendin e 45-të në renditjen botërore në kategorinë e peshës së saj, si dhe është renditur e 9-ta në Kampionatin Botëror për Të Reja në Tajvan. Aktualisht, çështja e saj po shqyrtohet edhe një herë nga drejtuesit e Federatës dhe përfaqësuesit e Ministrisë së Arsimit dhe Sportit. Në vijim, AlbanianSport.com do t’ju sjellë të plotë reagimin e trajnerit të saj dhe, njëkohësisht, edhe Zëvendës-Presidentit të FSHTW, Leo Kapri.
