ASNN – Niveli më i lartë i Kampionatit Kombëtar të Basketbollit për Meshkuj, Superliga, do të nisë sot fazën e dytë. Takimi hapës i javës së 6-të është ai ndërmjet Besëlidhjes dhe Apolonisë, që luhet duke nisur nga orën 17:00, në Pallatin e Sportit “Asllan Rusi” në kryeqytet. Lezhjanët vijnë pas një ecurie fantastike rezultatesh, duke i fituar të 5-ta ndeshjet e zhvilluara deri më tani.
Padyshi që ecuria e skuadrës së Afrim Bilalit është e jashtëzakonshme, me 32 fitoreve radhazi që prej kampionatit të kaluar, në të cilin u shpallën “kampionë” pa asnjë humbje. Moment të mirë po kalon edhe Apolonia, me ekipin fierak që vjen pas dy triumfesh, ndaj Tiranës në kryeqytetdhe Vllaznisë në shtëpi. Sot gjithashtu do të zhvillohet edhe ndeshja Kamza-Tirana.
Një takim interesant ky, që nis në orën 18:00 në Bathore, aty ku do të përballen përkatësisht vendi i tretë dhe ai i dytë. Java do të përmbylet të shtunën me ndeshjen Teuta-Vllaznia në orën 19:00 në Durrës. Sot do të zhvillohen gjithashtu edhe sfidat Elbasani-Fieri (18:00) për Kategorinë e Parë, si dhe Partizani-Vllaznia (15:00) në Kategorinë e Parë.
