ASNN – Janë luajtur 9 javë kampionat në Kategorinë Superiore, por asnjë futbollist deri më tani nuk ka mundur të bëjë diferencën në repartin sulmues. Edhe pse Amadu Latifi i Teutës mban kreun e listës së shënuesve me 7 gola të realizuar, duhet theksuar se një pjesë të mirë të golave i ka shënuar me 11-metërsh. Pas tij renditet Rexhinaldo i Kukësit, me 5 finalizime të sakta, por duhet thënë se Kukësi në total ka shënuar në 9 javë kampionat vetëm 9 gola, pra një gol për ndeshje, statistika këto që duhet t’i kishte si rregull vetëm një lojtar i vetëm.
Pra në një farë mase, Kukësi dhe Teuta janë të varur nga lojtari kryesor në sulm. Madje për durrsakët, Latifi ka shënuar 7 nga 9 golat gjithsej, duke qenë i domosdoshëm. Skënderbeu është skuadra që ka realizuar më shumë, plot 13 gola, duke qenë ekipi me sulmin më të mirë. Por në radhët e korçarëve golat janë më të shpërndarë. Bregu është autor i 3 golave, por 10 golat e tjerë i kanë shënuar futbollistët e tjerë, që do të thotë se Skënderbeu funksionon më mirë. Rivali kryesor i Skënderbeut, Partizani, ka shënuar 11 gola, ku Asani është më i miri me 3 finalizime, kurse të tjerët çalojnë mjaft.
Çka do të thotë se Partizanin po e nderon mbrojtja, sepse sulmit i duhen përforcime në merkaton e janarit. Kamza dhe Kastrioti janë skuadrat me sulmin më të dobët, me nga 5 gola secila, por duhet thënë se një skuadër me potencial të vogël sulmues është dhe Tirana, e cila ka realizuar vetëm 8 gola në 9 javë garë. Pra më pak se 1 gol për ndeshje dhe me statistika të tilla rrezikon rënien nga kategoria. Duke parë statistikat e skuadrave në fund të pjesës së parë, duhet pranuar se kampionatit të këtij sezoni i mungojnë dukshëm sulmuesit.
Është aq e dukshme kjo sa asnjë skuadër nuk ka një koeficient minimal realizimi 1.5 gola për ndeshje. Madje shumica janë në kufijtë e një gol për ndeshje, shumë pak krahasuar me normalen. Kjo tregon se Superiores shqiptare i kanë humbur nga qarkullimi “goleadorët” dhe në mungesë të “sulmuesve të racës”, humb bukuria e garës dhe mungon spektakli. Jo gjithmonë triumfon mbrojtja, kështu që problemi i futbollit shqiptar është se ekipet zinxhirë të klubeve nuk po nxjerrin sulmues të spikatur. Ky është fakt i pamohueshëm.
