ASNN – Janë luajtur të mërkurën takimet e para dhe Studenti dhe Tirana e kanë kaluar pa shumë probleme aktin e parë të fazës së “play off”-it të Kampionatit Kombëtar tëVolejbollit për Meshkuj. Në takimet e para të gjysmëfinaleve përkatëse të post-sezonit të rregullt, kampionët në fuqi fituan 3-0 kundër Vllaznisë në ndeshjen e luajtur në Pallatin e Sportit “Asllan Rusi”, kurse bardheblutë mposhtën Teutën po 3-0 në Sallën Sportive “Fahrie Hoti” në kryeqytet.

Përballë vendësve të Studentit, shkodranët tentuan vetëm në fillimin e tri seteve, por pa mundur të mbanin ritmin deri në fund. Vendësit shkëputen në +10 (19-9) dhe me gjithë dy pushimet e thirrura nga trajneri Kalaja, asgjë nuk ndryshon. Çali i lë vendin kapitenit Tukseferi. Është pikërisht ky lojtar që kombinon me Rrashketën dhe pika e 25-të për Studentin.

Në setin e dytë janë shkodranët që shfaqin më tepër grintë në fillim, por djemtë e trajnerit Kalaja shfaqin probleme edhe në topin e parë për ta mbyllur edhe setin e dytë në disfavor 25-19. Vllaznia kërkon të qëndrojë në ndeshje, por përvoja e Studentit e për më tepër superforma e Vuldiev në sulm, shuan shpresat e miqve me shifrat 25-16. Po pastër fituan në “Fahrie Hoti” edhe bardheblutë, të cilët shihen gjithashtu si pretendentë për titullin “kampion”.

Durrsakët nuk arritën të shfaqen të plotë, duke bërë që Tirana vendëse të mos e ndjejë forcën e rivalëve. Djemtë e trajnerit Arben Sako treguan superioritet që në setin e parë, të cilin e fituan 25-17. Edhe seti i dytë shkoi për kryeqytetasit me shifrat 25-16. Në të tretin durrsakët kundërpërgjigjen, por jo mjaftueshëm për të evituar humbjen. Ky set përfundon sërish me triumfin e Tiranës që hedh një hap të sigurt drejt finales së madhe. Gjysmëfinalet e dyta do të luhen më datën 4 prill 2015.

Kampionati Kombëtar

i Volejbollit – Meshkuj

Kalendari i “play-off”-it

Gjysmëfinalet

Ndeshja e parë

(1 prill 2015)

Të mërkurën:

Studenti – Vllaznia               3-0

(25-10, 25-19, 25-16)

Salla 1, Pallati i Sportit “Asllan Rusi”, Tiranë

Tirana – Teuta                       3-0

(25-17, 25-16, 25-19)

Salla Sportive “Fahrie Hoti”, Tiranë

Ndeshja e dytë

(4 prill 2015)

Të shtunën:

Vllaznia – Studenti               (18:00)

Pallati i Sportit “Qazim Dervishi”, Shkodër

Teuta – Tirana                       (18:00)

Pallati i Sportit “Ramazan Njala”, Durrës

Ndeshja e tretë*

(8 prill 2015)

Të mërkurën:

Studenti – Vllaznia               (18:00)

Salla 1, Pallati i Sportit “Asllan Rusi”, Tiranë

Tirana – Teuta                       (18:00)

Salla Sportive “Fahrie Hoti”, Tiranë