Studenti i kthen reston Tiranës në finalen e dytë të “play off”-it, për më tepër me një superndeshje të luajtur dje në Sallën Sportive “Fahrie Hoti”. Kampionët në fuqi fituan me përmbysje 3-1 dhe hakmerren pas asaj humbjeje fatale, 2-3, në “Asllan Rusi”. Në disavantazh me ndeshje, por edhe në inferioritet në tifozëri, “armata” e trajnerit Ylli Tomorri thuajse nuk e ndjeu fare, përkundrazi ishte dyfish e karikuar për një triumf.
Nga ana tjetër, Tirana e trajnerit Arben Sako ishte apatike në parket duke u prezantuar krejt ndryshe nga çfarë serviri në finalen e parë. Duhet theksuar se Finalja e dytë në volejboll për meshkuj, Tirana-Studenti, është shoqëruar nga një atmosferë të zjarrtë në Sallën Sportive “Fahrie Hoti”. Një mjedis i tejmbushur, madje shumë prej tyre kanë qenë të detyruar ta ndjekin edhe në këmbë.
Tifozeri nga të dy kampet dhe kurrsesi nuk mund të mungonin. “Fanatics”-at bardheblu, që kishin zënë vend diagonal të ndarë në dy grupe. Gjithë kohës në mbështetje të skuadrës së tyre, por që fundi rezultoi në disfavor të tyre. Megjithatë, në fund u përshëndetën me ekipin. Në të njëjtën kohë nuk munguan edhe tifozët e Studentit të shoqëruar edhe me vegla frymore, duke interpretuar pro kampionëve në fuqi.
Një koreografi fantastike ajo e djeshmja në “folenë” bardheblu që rrallë është parë në ndeshjet e lojërave me dorë dhe që duhet marrë si shembull. Tashmë festa është legjitime për volejbollistët e Studentit, por ajo që vlen të theksohet se kjo maratonë finale prej 5 ndeshjesh midis Tiranës dhe Studentit premton të jetë e luftuar deri në fund.
Kampionati Kombëtar
i Volejbollit – Meshkuj
Kalendari i duelit final:
Studenti – Tirana 11 prill 2015 2-3
Tirana – Studenti 14 prill 2015 1-3
Studenti – Tirana 17 prill 2015 ora 18:00
Tirana – Studenti 21 prill 2015 ora 18:00
Studenti – Tirana 24 prill 2015 ora 18:00
Shënim: Kampionia shpallet me tre ndeshje të fituara
