ASNN – Me takimin midis Laçit dhe Vllaznisë dhe atë midis Flamurtarit dhe Kukësit, që nisin të dy në ora 14:00, ngre siparin java e 14-të e Kategorisë Superiore të Kampionatit Kombëtar të Futbollit.
Kjo javë vazhdon me takimin e orës 17:00, midis Partizanit dhe Tërbunit, që do të luhet në Stadiumin Kombëtar “Qemal Stafa” në kryeqytet. Dy takimet e tjera luhen të enjten, duke nisur nga ora 17:00 dhe Skënderbeu pret në Korçë Bylisin.
Ndërsa po në të njëjtën orë, Tirana është mysafire në Durrës për t’u ndeshur me Teutën vendase. Kjo ndeshje, që do të luhet në Stadiumin “Niko Dovana”, do të sillet për sportdashësit drejtpërdrejt nga Rrjeti i Radio-Televizionit Shqiptar.
Durrsakët mbajnë vendin e 3-të të renditjes së Kategorisë Superiore, me 26 pikë, 6 më tepër sesa bardheblutë kryeqytetas, që ndajnë vendin e 4-t dhe të 5-të me Kukësin, me nga 20 pikë.
Renditjen e Kategorisë Superiore e kryeson Partizani, me 35 pikë, 4 më tepër sesa ndjekësja më e afërt dhe kampionia në fuqi, Skënderbeu.
