ASNN – Niveli i dytë i Kampionatit Kombëtar të Futbollit, që njihet si Kategoria e Parë, ka ngritur të premten siparin e javës së saj të 5-të, me takimin midis Sopotit dhe Dinamos.
Kjo ndeshje, që u luajt në Stadiumin “Redi Maloku” të Fushë-Krujës dhe që u soll për sportdashësit drejtpërdrejt nga Rrjeti i Radio-Televizionit Shqiptar, u mbyll në barazim 1-1.
Sopoti dhe Dinamo i janë falur pikës së bardhë të 11-metërshave, për të shënuar nga një gol secila dhe për të ndarë nga një pikë në takimin midis tyre, të vlefshëm për grupin B të Kategorisë së Parë.
Rrjeti i Radio-Televizionit Shqiptar do të sjellë sot, duke nisur nga ora 14:00, edhe takimin e vlefshëm për grupin A, apo grupin e Veriut, atë midis Kastriotit dhe Besëlidhjes.
Ndërkohë, të dielën, duke nisur nga ora 13:00, transmetuesi publik do të sjellë edhe takimin e vlefshëm për javën e 8-të të Kategorisë Superiore, midis Luftëtarit dhe Tiranës. Kjo ndeshje do të luhet në Fushën Sportive të Peqinit.
