ASNN – Fundjava do të vijojë të jetë e ngjeshur me transmetime sportive në Rrjetin e Radio-Televizionit Shqiptar. Kështu, pasi ka sjellë të premten një ndeshje të Euroligës së Basketbollit të Meshkujve, transmetuesi publik ka sjellë të shtunën drejtpërdrejt takimin e vlefshëm për javën e dytë të grupit A të Kategorisë së Parë.

Bëhet fjalë për takimin midis Kamzës dhe Erzenit, që u fitua nga vendasit me rezultatin 2-1. Të dielën, pas garës së Moto GP-së, që u transmetua në mëngjes, pasdreke do të vijnë dy ndeshje të tjera futbolli. Kështu, duke nisur nga ora 14:00, luhet takimi i vlefshëm për javën e dytë të grupit B të Kategorisë së Parë, midis Dinamos dhe Bylisit.

Ndërsa në mbrëmje, duke nisur nga ora 17:00, transmetuesi publik do të sjellë për sportdashësit drejtpërdrejt edhe takimin e vlefshëm për javën e 7-të të Kategorisë Superiore, midis Tiranës dhe Skënderbeut. Kjo ndeshje do të luhet në Stadiumin “Selman Stërmasi” të kryeqytetit.

Transmetimet sportive mbyllen të martën, me takimin e vlefshëm për javën e dytë të grupit A të Kategorisë së Parë, midis Elbasanit dhe Lushnjës.