ASNN – Dy emra të njohur në futbollin shqiptar, Dinamo dhe Apolonia, dikur kanë konkurruar edhe për titullin “kampion” në Kategorinë Superiore, tashmë luajnë në kategorinë inferiore, atë Të Parën, madje ndodhen në mesin e tabelës, në grupin B.
Dinamo ndodhet në vendin e 5-të, me 6 pikë, ndërsa Apolonia në të 7-in, me 5 pikë, pas 5 javëve të para të luajtura në Kategorinë e Parë. Fierakët nuk e kanë nisur mbarë këtë sezon, kur pasi kanë fituar ndeshjen e parë, kanë humbur 2 të tjerat e kanë barazuar 2.
Ndërsa Dinamo ka një fitore, 3 barazime e 1 humbje. Të dyja skuadrat kërkojnë fitoren për t’u ngjitur në renditjen e grupit B që kryesohet nga Lushnja me 15 pikë. Ndeshja Dinamo-Apolonia do të luhet sot në orën 14.00 në Pezë dhe do të transmetohet drejtpërdrejt nga Rrjeti i Radio-Televizionit Shqiptar.
