ASNN – Në mënyrë krejt të papritur, Luftëtari i pretendimeve të mëdha për t’u ngjitur në Kategorinë Superiore pas dy javësh kampionat është në kuotën e zero pikëve. Dhe më e keqja është se në dy ndeshje shtëpiake, atje ku javë më parë gjirokastritët nuk e diskutonin marrjen e pikëve maksimale, pas Dinamos ka dalë fituese dhe Sopoti. Në fakt fitorja në mesjavë me Bylisin në Kupën e Shqipërisë e kishte shtuar entuziazmin e tifozëve, të cilët ishin të bindur se Luftëtari do të ndryshonte në krahasim me ndeshjen ndaj Dinamos.
Por loja e dobët e zhvilluar ndaj Sopotit nuk bindi askënd. Gjirokastritët kanë pasur probleme në aksionet e tyre sulmuese, ndonëse në minutën e 5-të, Nelaj, i ndodhur pranë portës mike pas topit të marrë nga Çaço, mund të kishte shënuar. Tek vendësit ka dhe panik, sepse në të 8-n minutë, Ergys Mersini në një përplasje me mbrojtësit miq është dëmtuar rëndë dhe me pas është transportuar me autoambulancë në spital. Deri në fund të pjesës së parë, gjirokastritët kanë ushtruar presion, Lluka e Zholi janë ndalur nga pritjet e portieri Koçi dhe 0-0.
Pjesa e dytë ka nisur me gol, teksa Polisi, i sapofutur në lojë, ka shfrytëzuar gabimin e portierit Birja dhe miqtë janë në epërsi. Vendësit do ta kërkojnë me ngulm golin e barazimit, por mbrojtja solide e miqve dhe portieri Koçi nuk e kanë lejuar pësimin e golit. Madje ky i fundit e ka shmangur pësimin e golit në dy raste të Nelajt, në minutën e 58-të dhe në të 90-n. E përfundimisht Sopoti ka dalë fitues në Gjirokastër, kurse gjirokastritët e pretendimeve të mëdha kanë marrë goditjen e dytë duke mbetur në kuotën e zero pikëve.
Luftëtari – Sopoti 0-1
Shënues: Polisi 48’
Luftëtari: Birja, Çunaj, Rexha, Frashëri (Aliaj 46’), Erg. Mersini (Zholi 8’, Zhupa 75’), End. Mersini, Lluka, Duka, Çaço, Qejvani, Nelaj. Trajner: B. Devolli
Sopoti: Koçi, Bella, Kelmendi, Ballkoçi, Kullolli (Elezi 78’), Lezi, Cake, Kastrati, Iljazi (Polisi 46’), Dhima, Pinto. Trajner: G. Stojku
Gjyqtarë: K. Kola, R. Malaj, E. Rapi (Vlorë)
Kartonë të verdhë: Frashëri, Zhupa, Lluka, Çaço (2) / Kelmendi, Cake, Kastrati, Dhima, Pinto
Karton i kuq: Çaço
Minuta e golit:
48’ Portieri Birja ka gabuar në daljen e tij dhe në pasimin tek lojtari i vet, ndërsa ka përfituar Dhima, i cili ka pasuar tek sapo i futuri në lojë Polisi, që ka shënuar në portën gjirokastrite. (0-1).
