Sot në mbrëmje në kryeqytetin e Gjermanisë, Berlin, do të luhet finalja e Ligës së Kampioneve midis Juventusit dhe Barcelonës, e para midis tyre në historinë e kësaj veprimtarie. Të dyja skuadrat luajnë futboll të ndryshëm në disa kuptime, qoftë në aspektin teknik, taktik dhe sidomos sa i përket skemave dhe vizioneve dhe kjo e bën mjaft interesante përplasjen midis tyre. Barça shihet favorite për shkak se ka në gjirin e saj lojtarë shumë cilësorë dhe me një treshe sulmuese të frikshme të përbërë nga Mesi-Nejmar-Suarez, treshja sulmuese më efikase e sezonit që po lëmë pas.
Por Juventusi nuk ka frikë dhe lojtarët e saj janë duke menduar të shkruajnë historinë. Ata kanë besim se do ta mundin Barcelonën, siç bënë me Realin e Madridit në gjysmëfinale. Kështu beson edhe sulmuesi spanjolli i Juventusit, Alvaro Morata. Në kampin e Juventusit presin shumë nga talenti spanjoll, i cili si një ish-madrilen do të bëjë gjithçka për t’i shënuar Barçës në finalen e Ligës së Kampioneve. Falë golit të Moratës në “Santiago Bernabeu”, bardhezinjtë siguruan një biletë për në Berlin, por tashmë synimi i 22-vjeçarit është të ngrejë lart trofeun e Kampioneve.
“Skuadra është shumë e motivuar, – ka thënë Morata. – E dimë që do të luajmë një finale të Ligën e Kampioneve dhe nëse fitojmë mund të shkruajmë historinë. Të jesh pjesë e një sfide të tillë ndien emocione të veçanta. Jemi të ndërgjegjshëm se për ne do të jetë shumë e vështirë pasi kemi përballë një ekip shumë të fortë. Duhet të zhvillojmë një ndeshje perfekte për të mposhtur Barcelonën. A jam i emocionuar që do të luaj një finale kampionesh përballë Barçës? Patjetër që po. Do t’iu gënjeja nëse do t’u thosha jo. Jam rritur te Reali i Madridit dhe kam shumë miq aty.”
“Do të bëj gjithçka për të shënuar në finale dhe për të ndihmuar Juventusin të fitojë”, – shtoi ai. Sidoqoftë, Morata është i ndërgjegjshëm dhe shikon Barcelonën favorite në Berlin. “Të them të vërtetën për mendimin tim favorit janë ata. Barcelona ka një super ekip. Unë jam i sigurt se edhe ne do të kemi shanset tona, por favorite është padiskutim Barça”, – përfundoi sulmuesi spanjolli i Juventusit, Alvaro Morata.
