ASNN – Agjencia e njohur “GiveMeSport”, e cila operon në Internet si media racionale sportive dhe me artikuj mjaft të ndjeshëm analitik mbi zhvillimet sportive, ka provokuar ndjekësit e saj me një sondazh jo të zakonshëm. Nuk janë zgjedhur emra për të qenë në garë, por grupe emrash, në mënyrë që sportdashësit të ngatërrohen dhe të vihen në dilemë për të vendosur për sportistin më të mirë të të gjitha kohërave.
Në fakt, sondazhe të tilla organizohen shpesh nga media të ndryshme, sportive ose jo, pasi tërheqin vëmendje dhe lexues, për më tepër që shijet e njerëzve janë të ndryshme dhe sportet e preferuara janë të ndryshme. Natyrisht, ish-boksieri legjendar amerikan, Muhamed Aliu, ka ende një vend nderi në radhitje, pasi ka një ndikim të fortë si sportist unikal dhe me histori të pazakonta suksesi.
Agjencia në fjalë futi emrat e 16 sportistëve të ndarë në 4 grupe, duke i ftuar lexuesit të zgjedhin dy emra nga secili grup, në një proces përzgjedhjeje të vazhdueshme, deri sa të bëhej votimi final për sportistin më të mirë të historisë. Mes kandidatëve, në grupin e parë ishin: Ljuis Hemilton, Rozher Federer, Flojd Mejuedhër dhe Serena Uilliams. Në grupin e dytë u renditën Fil Tejlor, Majkëll Felps, Tom Bredi dhe Lionel Mesi.
Ndërkohë, në grupin e tretë u radhitën Tajgër Uds, Kristiano Ronaldo, Martina Navratilova dhe Majkëll Xhordan. Kurse LëBron Xhejms, Majkëll Shumaker, Pele dhe Mohamed Ali u radhitën në grupin e katërt. Në grupin e parë triumfoi Federeri, i cili konsiderohet nga shumë analistë e specialistë si tenisti më i mirë i të gjithë kohërave, pasi ka fituar 20 tituj “Grand Slem” dhe e ka shijuar suksesin edhe në Lojërat Olimpike.
Në grupin e dytë, argjentinasi Leo Mesi e kryesoi grupin me 75% të votave. Ndërsa, rivali i tij i vjetër, Kristiano Ronaldo, e fitoi garën në grupin e tretë. Çiftet gjysmëfinaliste u kompletuan me Muhamed Aliun nga grupi i katërt. Pra në gjysmëfinale kaluan Federer, Ronaldo, Muhamed Aliu dhe Mesi. Më pas u bë garë votimi për finalistët, ku fituan Mesi dhe Aliu.
Në finale e madhe, votat përcaktuan Lionel Mesin si sportisti më i madh i historisë. Edhe pse fitoi me një diferencë fare të vogël me Ali, (51%-49%) Mesi mori më shumë vota dhe kjo e bën atë sportistin më të madh të të gjitha kohërave.
