Java e 30-të e Kategorisë Superiore, e cila është mbyllur dje, jo vetëm që ka sjellëpërmbysje të kreut, por ka dhënë një rezultat krejtësisht të pamenduar nga askush. Të paktën kjo jo vetëm për sfidën e luajtur në “Zeqir Ymeri”të Kukësit, por dhe në Korçë, ndërsa të kuqtë shpresonin shumë të frenonin Skënderbeun dhe të ngjiteshin në vendin e parë.
Mirëpo Skënderbeu, me petkun dhe stofin e një skuadre katër herë radhazi “kampione”, ia ka dalë të jetë fituese. Dhe jo pak, por me një rezultat bindës, 5-2. E duke përfituar nga frenimi i Kukësit nga Laçi, Skënderbeu është në vendin e parë në renditje. “Ishte një ndeshje e vështirë”, – ka deklaruar pas ndeshjes kapiteni i Skënderbeut, Bledar Shkëmbi.
“Ne e mendonim edhe më të vështirë kjo për shkak të mungesave që kishim por ia dolëm dhe për këtë jam i lumtur, – ka vijuar ai. – Sot kemi sakrifikuar shumë për këtë ndeshje dhe në fund jemi shpërblyer me këtë fitore të madhe. Ekipi luajti i bashkuar ndaj dhe loja ishte aq e mirë. Përsa i përket dëmtimit tim kisha dhimbje para takimit ashtu si edhe në ndeshjen ndaj Kukësit.”
“Por bëra një gjilpërë për të qetësuar dhimbjet dhe më pas isha i gatshëm për të luajtur”, – ka përfunduar Shkëmbi. Ndërsa trajneri i Partizanit, Shpëtim Duro, të cilit i është vënë seriozisht në pikëpyetje qëndrimi në krye të stolit të të kuqve kryeqytetas, nuk kërkoi të justifikohej. “Ishte një ndeshje amatoreske, sidomos në aspektin mbrojtës, – ka deklaruar ai. – Skuadra gaboi në të gjitha aspektet dhe kjo është e pafalshme.”
“Patëm një moment të mirë kur realizuam golin e parë, por përsëri gabuam. Nuk dua t’i heq meritat Skënderbeut pasi ishte dukshëm më lart, por unë dua të merrem më shumë me skuadrën time. Më vjen turp nga tifozët dhe ju kërkojmë falje. Kampionati nuk ka mbaruar ende dhe ne mbetemi në garë. Një gabim tjetër do të ishte fatal dhe do të na nxirrte jashtë garës për titull”, – ka përfunduar trajneri i Partizanit, Shpëtim Duro.
Në fakt, askush nuk mund ta parashikonte një 5-2 fitoren e korçarëve ndaj Partizanit. Serinë e golave për korçarët e ka hapur Lilaj në minutën e 13-të, që është pasuar nga Latifi në të 38-tën. Por, kur Raçiçi ka shënuar në fundin e pjesës së parë të gjithë shpresuan që të kuqtë do të mund të ndryshojnë situatën. Por Skënderbeu është i papërmbajtshëm.
Shënon Berisha, Stojkov dhe në minutën e 54-të shifrat e rezultatit janë 4-1 për korçarët. Ka ngushtuar sërish Raçiçi, kurse Radas ka vulosur rezultatin përfundimtar 5-2 për Skënderbeun, që është kryesues i kampionatit.
