ASNN – Skënderbeu ka arritur një fitore me peshë në Kupën e Shqipërisë teksa ka mposhtur 1-3 në “Selman Stërmasi” Dinamon dhe duke u kualifikuar për në gjysmëfinale. Shifrat u hapën me Mensah në minutën e 22-të, Berisha realizoi golin e dytë në minutën e 43-të dhe më pas Pusi trefishoi rezultatin pas një ore lojë. Goli i Uelber në minutën e 63-të krijoi idenë sikur do të hapte sfidën, por ky rezultat i shkon përshtat skuadrës korçare e cila këtë sezon po përjeton momentin e vështirë në 10-vjeçarin e fundit, teksa po lufton për mbijetesë.
Por Kupa e Shqipërisë mbetet një objektiv real për Skënderbeun duke parë paraqitjen e ditës së sotme ndaj kryeqytetasve. Dhe trajneri Migen Memelli është i kënaqur që Skënderbeu u kualifikua në gjysmëfinale, por mendjen e ka te mbijetesa në Superiore. Trajneri i korçarëve foli pas ndeshjes, duke theksuar se ishte një fitore e merituar. “Ishte një fitore e merituar, – tha ai. – Pas golit të dytë na u thjeshtësua loja, ndërsa goli i tretë mbylli gjithçka. Synimi jonë është mbijetesa në Superiore, jo Kupa. Do të bëjmë gjithçka për të qëndruar në elitë, edhe pse e dimë që është e vështirë.”
“Ne besojmë deri në fund, – ka vijuar ai. – E kishim vlerësuar ndeshjen me Dinamon në maksimum. Është merita e lojtarëve, gjërat u bënë mirë në fushë. Goli erdhi shpejt. Pasi dyfishuam rezultatin shkuam në dhomat e zhveshjes më të qetë. Pas golit të tretë, menduam që të hedhim në fushë lojtarët që kanë pasur më pak minuta. Kemi ndeshjen me Apoloninë, por gjithsesi shumicën e skuadrës e hodhëm në fushë. Rotacioni në këto ndeshje është i vështirë. I uroj lojtarët për këtë fitore dhe suksese. Tani nuk e dimë se si do biem në gjysmëfinale, por objektivi është qëndrimi në Superiore.”
“Nuk e di nëse do e falja Kupën për mbijetesën. Duhet edhe pak fat dhe sforco për këto 12 javë të mbetura”, – ka përfunduar trajneri i Skënderbeut.
