ASNN – Korçarët i japin fund periudhës përgatitore dimërore dhe tashmë janë gati për kampionat. Josa i ka provuar të gjithë lojtarët në dispozicion, kurse për kampionët ka pasur raste për shënim. Skënderbeu e ka humbur ndeshjen e fundit miqësore të luajtur në tokën spanjolle, duke i mbyllur këto takimet përgatitore me disfatën ndaj skuadrës së njohur gjermane, Fortunës së Dyseldorfit.
Një humbje që edhe mund të ishte shmangur nga skuadra e Josës, por që gjermanët kanë qenë me fat në ato raste që kanë pasur në portën korçare. Josa dje, ndryshe nga ndeshjet e tjera testuese, ka provuar thuajse gjithë grupin e lojtarëve. Me përjashtim të dy mbrojtësve Kristi Vangjeli dhe Leonit Abazi, kryepankina korçare ka aktivizuar të gjithë grupin e lojtarëve që ka pasur në dispozicion.
I vetmi që nuk ka luajtur sigurisht që ka qenë Jashanica, i cili vijon prej ditësh të qëndrojë në infermierinë korçare. Në fund të takimit, një humbje që erdhi nga një gol në secilën pjesë nga gjermanët, falë edhe gabimeve të bardhekuqve. Skënderbeu, nga ana e vet, ka krijuar një volum të madh loje dhe ka pasur edhe disa raste shënimi. Por që dje nuk ka arritur të shënojë në portën e Dyseldorfit.
Duhet thënë se Takaj, një ditë para kesaj ndeshje, është shprehur se në kushte kur me skuadrat gjermane gjërat na kanë shkuar mirë, përse të mos e fitojnë këtë takim të fundit. Por nuk është realizuar dëshira e “bosit” edhe për atë se gjermanët kanë ditur të bëjnë diferencen në kohën e duhur. Si në rastin e dy golave. Sa u përket golave, i pari për gjermanët ka ardhur në minutën e 40-të.
Pas një aksioni të shpejtë individual, Hoferi ka arritur t’u shmanget mirë të gjithë lojtarëve të mbrojtjes korçare, përfshi këtu edhe “gardianin” Shehi, ndërsa nuk e ka pasur të vështirë për të shënuar në portën e Skënderbeut. Atëherë kur mendohej se me atë gol të minutës së 40-të edhe mund të mbyllej e gjithë ndeshja, ka ardhur i dyti gol i këtij takimi.
Kësaj radhe me Pinton, lojtar i futur në pjesën e dytë, që ka shënuar mrekullisht në portën e mbrojtur nga Llapanji 12 minuta para fundit. Në fundin e lojës, Hofer ka goditur dhe shtyllën e portës korçare. Madje gjermanët kanë shënuar dhe një gol të tretë në të 88-të, që është quajtur i parregullt. Përfundimisht 2-0 për gjermanët dhe një ndeshje e mirë për Skënderbeun
Fortuna Dyseldorf – Skënderbeu 2-0
Shënues: Hofer 40’, Pinto 78’
Fortuna Dyseldorf: Rensing, Erat, Soares, Bomhojer, Veber, Akça (Gartner 68’), Finsh (Pinto 57’), Halloran (Shauerte 57’), Benshop (Liendl 68’), Lamberçi (Bebu 57’), Hofer. Trajner: O. Rek
Skënderbeu: Shehi (Llapanji 46’), Vangjeli, Radas (Osmani 46’), Arapi (Lulaj 46’), Abazi, Lilaj (Kame 46’), Shkëmbi (Alikaj 46’), Nimaga (Sefa 46’), Berisha (Martins 46’), Progni (Latifi 46’), Peter (Stojkov 75’). Trajner: M. Josa
