Vetëm dy takime larg historisë dhe skuadra e trajnerit Mirel Josa ka shansin e madh të futet në fazën e grupeve të Ligës së Kampioneve, ose, më e pakta, në fazën e grupeve të Ligës së Evropës, gjithmonë nëse eliminon Milsamin. Në kampin korçar janë angazhuar të gjithë në funksion të këtij qëllimi, duke filluar nga lojtarët, trajneri dhe pjesëtarët e tjerë të stafit, si dhe nga drejtuesit e klubit.
Optimizmi është shumë i madh, por Skënderbeu ka udhëtuar dje drejt Kishinjevit, kryeqytetit të Moldavisë, me mungesa të rëndësishme dhe me probleme sidomos në repartin e mbrojtjes. Trajneri Mirel Josa në sfidën e parë ndaj Milsamit duhet t’i bëjë llogaritë pa dy nga mbrojtësit kryesore të skuadrës, pasi Tefik Osmani është i dëmtuar ndërsa Renato Arapi është i pezulluar për shkak të kartonit të kuq që mori në takimin e kthimit ndaj Krusejdërs.
Nëse në portë Orges Shehi e ka vendin të sigurt, në mbrojtje me shumë mundësi do të jenë Jashanica dhe Abazi, dy lojtarët që do të zëvendësojnë Osmanin dhe Arapin respektivisht në qendër dhe në krahun e majtë të repartit të tërhequr. Në të djathtë të mbrojtjes ashtu si zakonisht do të luajë Kristi Vangjeli. Ndërsa kroati Marko Radas do të jetë partneri i Bajram Jashanicës në qendër.
Sipas të gjithave gjasave formacioni i Skënderbeut ndaj Milsamit do të jetë me skemën 4-3-2-1 dhe në treshen e mesfushës do të veprojnë disi më në qendër kapiteni Bledi Shkëmbi, i mbështetur nga Sabien Lilaj dhe Bakari Nimaga, që do të rreshtohen përkrah tij. Bernard Berisha, njeriu i momentit te kampionët e Shqipërisë do të luajë në krahun e majtë të mesfushës por si gjithmonë do të ketë më shumë detyra sulmuese ndërsa në të djathtë Liridon Latifi.
Autori i një goli në sfidën e kthimit ndaj Krusejdërs duket se ka fituar balotazhin me Gerhard Prognin dhe do ta nisë që nga minuta e parë. Në repartin e avancuar do të jetë i vetëm Hamdi Salihi, por në momentin që skuadra sulmon skema e Skënderbeut kthehet nga 4-3-2-1 në 4-3-3 dhe golashënuesi shkodran do të ketë përkrah Berishën dhe Latifin.
