ASNN – Skënderbeu i vendit të parë në Kategorinë Superiore ka shkatërruar Laçin 6-1 në ndeshjen e zhvilluar këtë të mërkurë. Korçarët e mbyllën ndeshjen që në 45 minutat e para, duke shënuar 6 herë. Serinë e golave e hapi Abazi, që në minutën e katërt, ndërsa më pas Xhejms e Eskuerdinja shënuan nga dy gola.
Golin në këtë takim e gjeti edhe sulmuesi më i mirë i Kategorisë Superiore, Hamdi Salihi. Pjesa e dytë ishte më shumë si një ndeshje stërvitore për kampionët e Shqipërisë. Në këtë 45-minutësh, Laçi arriti të gjejë golin e nderit me Argjend Mustafën në të 60-ën.
30 minutat e mbetura ishin thjesht të sikletshme për dy ekipet që lanë orën të ecte për to. Pas kësaj fitoreje, Skënderbeu e ka pritur i qetë derbin Tirana-Skënderbeu, që ka nisur të luhet në ora 18:30, duke menduar, pse jo, edhe për përballjen direkte me të kuqtë në Korçë.
