ASNN – Klubi korçar është duke marrë parasysh edhe mundësinë e një përplasjeje të mundshme mes tifozëve kroatë e atyre shqiptarë në Elbasan, ndërkohë që dihet që klubi i Dinamos së Zagrebit ka një grupim “ultras”-ish që ka krijuar jo pak probleme në ndeshjet e shkuara të skuadrës kroate. “Blue Boys” të Zagrebit janë të njohur për huliganizmin e tyre, por ka një sinjal të mirë që, midis dy vendeve tona ka miqësi dhe grupimet “ultras” të të dy vendeve kanë thjesht probleme me serbët dhe jo me njëri-tjetrin.
Sidoqoftë, policia pritet të marrë masa të mëdha organizuese për të evituar përplasjet në këtë ndeshje të parë Skënderbeu-Dinamo e Zagrebit. Madje është mësuar se Dinamo e Zagrebit nuk do të ketë në dispozicion tifozët “ultras” në ndeshjen e parë të “play-off”-it të Ligës së Kampioneve, që do të zhvillohë në “Elbasan Arena” përballë Skënderbeut më datë 19 gusht. Lajmi konfirmohet për mediat nga drejtori i stadiumit të Elbasanit, Dritan Kadia. Policia Shqiptare dhe drejtuesit e ekipit të Skënderbeut u tremben trazirave të mundshme nga huliganët kroatë.
Për këtë arsye, ata synojnë të bllokojnë udhëtimin e “ultrasve” të Dinamos së Zagrebit drejt Elbasanit. Por si do të identifikohen 700 tifozët e Dinamos që do të udhëtojnë në Elbasan? “Kemi komunikuar me drejtuesit e ekipit të Dinamos së Zagrebit dhe, nisur nga incidentet e mundshme që mund të shkaktojnë tifozët, vendosëm që të bllokojmë udhëtimin e tyre për në ndeshjen me Skënderbeun, – ka deklaruar Kadia. – Për ndeshjen e 19 gushtit Dinamo ka në dispozicion 700 bileta dhe ata që do të udhëtojnë nga Kroacia do të kontrollohen imtësisht në të gjitha pikat e kalimit kufitar.
“Po ashtu, do të kontrollohen sërish në fund, para futjes në stadium, – ka vijuar drejtori i “Elbasan Arena”. – Tifozët që do të udhëtojnë në Shqipëri, Dinamo e Zagrebit do t’i pajisë me një leje, dokumentet të veçantë me të gjitha të dhënat personale dhe kur të mbërrijnë në Elbasan para futjes në stadium do t’u merret leja dhe do të pajisen me bileta.” Takimi midis Skënderbeut dhe Dinamos së Zagrebit, i vlefshëm për fazën e “play-off”-it të veprimtarisë më prestigjioze të klubeve të kontinentit, Ligës së Kampioneve, do të luhet më 19 gusht 2015, duke nisur nga ora 20:45.
