Në ndeshjen e djeshme Vllaznia-Skënderbeu, debutimi i lojtarit kryesor të skuadrës korçare, Hamdi Salihi, nuk ka qenë ai që pritej, pasi golashënuesi është dëmtuar që në nisje dhe ka kërkuar zëvendësimin, si pasojë e një tërheqjeje të rëndë muskulore. Lajmet për gjendjen e tij janë kontradiktore, por sulmuesi ka gjasë të mungojë për disa javë, gjë që do të ishte një minus i madh për ekipin e Mirel Josës në prag të ndeshjes së rëndësishme në Ligës së Evropës përballë turqve të Beshiktashit.
“Salihi ka një tërheqje në biceps, nesër do të dalë në mëngjes pas rezonancës më e saktë, por besoj që për tre javë nuk do të dalë me skuadrën, të paktën ashtu siç tha mjeku në pamje të parë”, – deklaroi pas ndeshjes trajneri i Skënderbeut, Mirel Josa. Instikti i golit ka bërë që sulmuesi shkodran, në tentativë për të mbërritur një top në zonën e Vllaznisë, është zgjatur më shumë se sa duhet, çka i shkaktuar më pas dhembje në kofshë.
Kjo e ka bërë që Salihi të kërkojë menjëherë zëvendësimin e tij. Ai ka dalë nga fusha e lojës duke çaluar, ndërkohë që stafi mjekësor i skuadrës korçare menjëherë ka nxituar pranë sulmuesit. Informacionet e para që vinë nga stafi mjekësor korçar janë shqetësuese për gjendjen fizike të Salihit, i cili edhe mund të mungojë gjatë në skuadër. Dyshohet që sulmuesi mund të ketë pësuar një tërheqje muskulore, e cila mund ta vërë në dyshim aktivizimin e tij për ndeshjen e parë të Ligës së Evropës, ndaj turqve të Beshiktashit, më 17 shtator në “Elbasan Arena”.