ASNN – Synohet mbushja plot e Stadiumit “San Siro” për takimin e së premtes. Situata të jashtëzakonshme bëjnë thirrje për masa të jashtëzakonshme. Dhe me Milanin në krye të renditjes së Serisë A, në kuotën e 56 pikëve, dy më tepër sesa ndjekëset më të afërta, Interi, që sidoqoftë ka luajtur një ndeshje më pak, dhe Napoli, drejtuesit e klubit duan mbështetje maksimale për skuadrën.

Kështu, të premten, një biletë kushton 1 euro në 11 sektorë të stadiumit “San Siro”. Kjo është nisma që Milani është duke promovuar para ndeshjes që do të zhvillojë të premten në shtëpi ndaj Udinezes. Ideja është që të mbushet stadiumi edhe në një ndeshje të ndërlikuar disa sa i përket orarit. Kjo përballje është parashikuar të luhet të premten, duke nisuar nga ora 18:45.

Lejimi i përdorimit të kapacitetit prej 75 % të vendeve, pas lehtësimit të masave nga epidemia e “Covid-19”, do të thoshte praktikisht se në stadium mund të jenë të pranishëm saktësisht 56,904 spektorë. E për ta arritur këtë shifër, “kuqezinjtë” kanë nisur fushatën “Promo Friends”. Kështu, mësohet se secili person e ka të drejtën t’i blejë deri në 3 bileta.

Pra, stadiumi i qytetit pritet të jetë thuajse i mbushur të premten, teksa Milani do ta kërkojë fitoren e radhës, në garën e tij për titullin e kampiones në Itali. Interi është mysafir në fushën e Xhenoas në takimin që luhet po të premten, duke nisur nga ora 21:00.