ASNN – Peshëngritja shqiptare në veçanti, por edhe sporti shqiptar në përgjithësi ka marrë një goditje të rëndë pasi dy sportistë të tjerë,kampioni i botës, Daniel Godelli, dhe kampioni i Evropës për Nën-23-vjeçarët, Hysen Pulaku, kanë rezultuar pozitiv për përdorimin e substancave të ndaluara.

Ndërkaq, edhe Shqipëria si vend rrezikon pezullimin pa afat nga të gjitha veprimtaritë ndërkombëtare. Vetëm pak ditë pas lajmit se Romela Begaj ka rezultuar pozitive për përdorimin e substancave të ndaluara, një tjetër lajm akoma edhe më i keq vjen nga fronti i peshëngritjes shqiptare.

Ndonëse nuk është konfirmuar zyrtarisht nga ana e Federatës Shqiptare të Peshëngritjes, burime pranë këtij organizmi kanë konfirmuar për AlbanianSport.com se edhe dy sportistë të tjerë, kampioni i botës, Daniel Godelli, dhe kampioni i Evropës për Nën-23-vjeçarët, Hysen Pulaku, kanë rezultuar pozitiv për përdorimin e substancave të ndaluara.

Në fakt, të mërkurën në mbrëmje vonë u spekulua se Pulaku kishte rezultuar pozitiv për përdorimin e substancave të ndaluara, ndërsa të enjten në mëngjes, është mësuar se bëhet fjalë edhe për Daniel Godellin. Të dy këta sportistë kanë rezultuar pozitivë në analizat e kryera gjatë Botërorit të Të Rriturve, që mbajt muajin nëntor në Almati të Kazakistanit.

Me këta dy sportistë, shkon në 5 numri i peshëngritësve shqiptarë që kanë marrë medalje në arenën ndërkombëtare dhe më pas kanë rezultuar pozitiv për përdorimin e substancave të ndaluara. Këta sportistë janë Fetije Kasaj, Erkand Qerimaj, Romela Begaj, Hysen Pulaku dhe Daniel Godelli.

Ndërkohë, me 4 sportistë që rezultojnë pozitivë për përdorimin e substancave të ndaluara brenda një viti Shqipëria si vend rrezikon automatikisht pezullimin pa afat nga të gjitha veprimtaritë ndërkombëtare.