ASNN – Për shumëkënd, gushti nënkupton pushime, ndërsa për futbollistët dhe futbollistet e Kombëtares ka nisur puna për edicionin e ardhshëm futbollistik, ku shumë prej tyre janë të përfshirë në ndeshje miqësore me klubet e tyre, në veprimtaritë e organizuara nga UEFA, por në disa shtete, edhe kanë nisur kampionatet e sezonit të ri, 2021-2022. E vetmja gjë që nuk diskutohet kurrë sa herë që flitet rreth dhe për futbollin, është mungesa e emocioneve. E sidomos në Shqipëri, ku numri i sportdashësve është i shumtë, të cilët ndjekin me kërshëri të madhe futbollin, sa herë që flitet për ekipet Kombëtare, por jo vetëm, pasi një interes të lartë ka edhe për kampionatet që organizohen në vendin tonë.
Shtatori është padyshim muaji i një “oqeani” me emocione. Është muaji i ekipeve Kombëtare, është muaji i të gjithë shqiptarëve. Në fakt, gjithmonë ka qenë. Dikush në stadium, dikush në shtëpi, dikush ulur në një kafe, dikush në një vend të qetë, të gjithë të ndarë, por me sytë dhe zemrën nga krenaria e të gjithëve: Kombëtarja. Ndoshta është ndër të paktat gjëra, për të mos thënë e vetmja që na bashkon. Shpesh të mërzitur nga ndonjë rezultat negativ, nga ndonjë rezultat i pamerituar, por nuk ndodh kurrë që ta braktisim. Bërtasim, ndoshta edhe shajmë, gjejmë fajtorët, drejtojmë gishtin, themi se nuk do e ndjekim më, por kjo nuk ndodh. E çuditshme, por e vërtetë!
Ata mund të humbasin një ndeshje, por nuk na zhgënjejnë kurrë. Dhe sërish, është ndër të paktat raste kur ne shikojmë persona që i falin zemrën një fushe futbolli. Kombëtarja do të na bashkojë të gjithëve që nga 2 shtatori 2021, kur kuqezinjtë do të nisen drejt Polonisë, aty ku do të vijojnë rrugëtimin e nisur në muajin mars, për kualifikueset e vlefshme për Kampionatin Botëror “Katar 2022”. Tre ndeshje të luajtura, ndaj Andorrës dhe San Marinos, dy fitore në këto dy vizita dhe një humbje në Stadiumin “Arena Kombëtare”, ndaj Anglisë, finalistes së “EURO 2020”-ës. 6 pikë të grumbulluara, 3 gola të shënuar dhe dy të pësuar, ky është bilanci i kësaj Kombëtareje deri më tani.
Kombëtare që do të shkojë drejt Polonisë me qëllim që të vazhdojë me ecurinë pozitive në këto kualifikuese. 3 ditë më vonë, më 5 shtator 2021, drejt Shqipërisë do të udhëtojnë hungarezët, me të cilët jemi përballur 6 herë në historinë e këtyre dy Kombëtareve. Ndërkaq, më 8 shtator 2021 do të përballemi me San Marinon modeste, për t’u rikthyer më pas sërish në tetor me ndeshjet e tjera. Edhe Shqipëria e Nën-21-vjeçarëve, e drejtuar nga trajneri Alban Bushi do të luajë në shtator. Shpresat do të udhëtojnë drejt Republikës Çeke, ku do të përballen me përfaqësuesen vendase, në sfidën e vlefshme për Eliminatoret e Kampionatit Evropian të 2023-shit.
Ndeshjen e parë, kuqezinjtë e Bushit e zhvilluan në fushë të huaj ndaj Andorrës, ku fituan dhe e nisën mbarë këtë edicion, duke marrë 3 pikëshin e parë. Me vetëm një ndeshje në shtator, Shpresat do të rikthehen sërish në fushën e blertë në muajin tetor për të vazhduar me rezultatet pozitive. Trajneri Armando Cungu, i cili u emërua këtë vit në stolin e Shqipërisë së Nën-19-vjeçarëve ka zhvilluar disa ndeshje miqësore, ku e fundit ishte në Itali, ndaj “axurrëve” vendas, ndërsa më 3 dhe 5 shtator 2021, kuqezinjtë do të presin në shtëpi Izraelin, ku Cungu do të ketë mundësi të vëzhgojë elementet dhe skuadrën e tij, për të krijuar ide mbi grupin që do të përfaqësojë Shqipërinë në Eliminatoret e Kampionatit Evropian të 2022-shit.
Aty kuqezinjtë shorti i ka vendosur në Grupin 7 së bashku me Francën, Serbinë dhe Maqedoninë e Veriut, me ndeshjet që do të luhen në Shqipëri në datat, 10, 13 dhe 16 nëntor 2021. Edhe Kombëtarja e Nën-17-vjeçarëve “ka rezervuar dy bileta” drejt Kosovës këtë shtator, me dy miqësore vëllazërore. Ashtu sikurse homologut Cungu, edhe trajnerit Ervin Bulku do t’i shërbejnë këto miqësore për të vëzhguar dhe krijuar ide më të qarta mbi skuadrën që do t’i besojë përfaqësimin në Eliminatoret e Kampionatit Evropian të 2022, ku kuqezinjtë shorti i ka vendosur në grupin 12, së bashku me Italinë, Skocinë dhe Irlandën e Veriut. Ndërkaq, për Kombëtaren e femrave nis një edicion i ri, Botërori “Australi-Zelandë e Re”.
Rrugëtimi do të nisë nga Shqipëria, ku më 16 shtator 2021, vajzat kuqezi do të presin Kosovën në shtëpi, ndërsa 5 ditë më vonë do të luajnë ndaj një rivali të fortë siç është Belgjika. Synimi është 6 pikë në dy ndeshje, për ta nisur sa më mbarë këtë sezon, teksa të besuarat e trajnerit Armir Grima janë ngjitur në vazon e 4-t tashmë, duke lënë pas vende si Mali i Zi, Turqia, Maqedonia e Veriut etj. Një arritje e jashtëzakonshme kjo për futbollin e femrave në Shqipëri, që është ndër përparësitë kryesore të Federatës së Futbollit, e që ka hartuar një strategji të mirëfilltë për ta zhvilluar më tej. Në shtator rikthehet të luajë edhe Kombëtarja e femrave për grupmoshën e Nën-17-vjeçareve, skuadër që drejtohet nga Agustin Kola.
Shqipëria është në grupin B, me Azerbarbajxhanin dhe Malin e Zi dhe gjendet në Ligën B, teksa do të luftojë që të ngjitet në Ligën A. Ndeshjet do të zhvillohen më 24, 27 dhe 30 shtator 2021 në Shqipëri. UEFA ia ka besuar Federatës së Futbollit organizimin e këtyre ndeshjeve, duke konfirmuar edhe njëherë seriozitetin dhe besueshmërinë e FSHF-së si partner. Duket se gjithçka na mbetet është vetëm të shikojmë dhe shijojmë këtë shtator, që pa diskutim do të jetë muaji i emocioneve të mëdha.
