ASNN – Një fillim si rrallëherë në një fazë eliminatore, sepse, pas vetëm dy ndeshjesh, kuqezinjtë e gjejnë veten në krye të renditjes së grupit G, të ashtuquajtur një “grup i hekurt”, që ka në përbërje dy kampionë bote dhe Evrope si Spanja dhe Italia. Kombëtarja kuqezi fitoi sonte në Lihtenshtejn ndaj përfaqësueses vendase, me rezultatin 2-0, falë golave të shënuar nga Jahmir Hyka dhe Bekim Balaj.
Në minutën e 10-të, një aksion me disa pasime finalizohet nga Jahmir Hyka, që pavarësisht se nuk është shtatlartë, goditi me kokë topin, që portieri i skuadrës vendase fillimisht e ndaloi, e më pas e shtyu në rrjetë në mënyrë të pavullnetshme. Për FIFA-n, ky ishte një autogol i portierit dhe në fakt edhe mund të cilësohet i tillë. Minutat e mbetura të pjesës së parë kaluan me disa aksione të Shqipërisë.
Aksione të papërfunduara për mungesë të aftësisë së sulmuesve, por edhe prej rreshtimit të ngjeshur të Lihtenshtejnit. Dhe, deri në mesin e pjesës së dytë, ishte pa a shumë e njëjta tablo, me vendasit që mbaheshin dhe me kuqezinjtë që kërkonin golin e dytë, që ishte edhe goli i sigurisë. Përpjekjet e Kombëtares u shpërblyen në minutën e 71-të, me golin e dytë, që ka si autor Balajn.
Ky i fundit ktheu në rrjetë harkimin e Elseid Hysajt, ndërsa pak para shënimit, i ishte mohuar goli edhe nga portieri vendas. Duhet theksuar se ky është goli i dytë në po aq ndeshje për sulmuesin shkodran, që po e zëvendëson kështu më së miri sulmuesin e dëmtuar, Armando Sadiku. Kjo fitore sigurisht që do t’i japë më shumë optimizëm ekipit të trajnerit Xhovani De Biazit, që do të përballet ditën e diel, me Spanjën.
Kjo sfidë, që luhet më 9 tetor 2016, do të jetë një ndeshje e vështirë, ku Shqipëria do të ketë si objektiv të ruajë vendin e parë në grupin G. Spanja vjen në këtë ndeshje pas fitores 8-0 me Lihtenshtejnin në ndeshjen e parë dhe barazimin 1-1 që mori sonte në Itali përballë përfaqësueses vendase.
